Адамланы онгларын ангылап, къолубуздан келгенча болушлукъ этерге кюрешебиз

Юсюбюздеги жылны он айыны ичине Россельхозбанкны республикада филиалы Къабарты-Малкъарда жашагъан  1800 адамгъа ёнкюч бергенди, битеу да ол сумма 1 миллиард 255 миллион сом болгъанды, деп билдиргенди финанс учрежденияны пресс-службасы.

Артыкъ да бек адамла «Пенсионный» эм «Потребительский..»   деген кредитлени алыргъа сюедиле. Башда айтылгъан кезиуню ичинде кюн сайын керек бола тургъан жумушлагъа деп 1500 кредит, башхача айтханда, 530 миллион сом берилгенди. Ол кёрюмдю озгъан жылны бу кезиую бла тенглешдиргенде 1,5 кереге кёпдю.

Аслам халда  харкюнлюк жумушланы тамамлаугъа керек ёнкючлени бериу жаны бла ахшы кёрюмдюлени Терек шахарда орналгъан къошакъ бёлюм эм Нальчикде ара офис кёргюзтгендиле. Берилген кредитлени араларында сагъынылгъан жерле  битеу да 30 процентни тутадыла.

 «Харкюнлюк жумушланы тамамлаугъа ёнкючле бериу-ол Россельхозбанкны магъаналы бёлюмлеринден бириди.  Адамлагъа кредитлени бериу  жаны бла бизни кёп тюрлю программаларыбыз барды. Кесибизни клиентлерибизни онгларын ангылап, алагъа тап болсун деп аллай амалланы хайырланыргъа кюрешебиз. Аны бла бирге биз ишибизде кёрюмдюлени да кётюрюрге, адамланы да ыразы этерге кюрешебиз», - дегенди Россельхозбанкны Къабарты-Малкъар Республикада филиалыны таматасы Алим Сокуров.

Бизни корр.