Пандемияны кезиуюнде - бизнесге болушлукъ

Былтыр Къабарты-Малкъарда пандемияны кезиуюнде гитче эм орта предпринимательстволукъгъа (МСП)  къыралдан болушлукъ берилгенини хайырындан   финанс-экономика болум  осалына кетмезча себеплик этилгенди.  КъМР-ни экономиканы айнытыу министри Рахайланы Борис айтханнга кёре, аллай тутхучлукъ мындан арысында да боллукъду. Ол санда чекле салыннган кезиуде республикада МСП-ны субъектлерине иш хакъланы тёлерча 15 ноябрьден башлап  грантла бёлюнюп тебирерикдиле.

- Быйыл бизнесге болушурча федерал эм республикалы программала бардырыладыла.  Коронавирус жайылыргъа къоркъуулу кезиуде  чекле салыргъа тюшеди. Ол заманда предприятие  ишчилерине айлыкъларын тёлерге онгу болурча къыралдан  ахча бёлюнюнюркдю. Былтыр предприятиялагъа аллай  болушлукъ этилгени ючюн социал-экономика кёрюмдю   осалына кетмей сакъланнганды,  деп къошханды Рахай улу.

Былтыр КъМР-ни Правительствосуну бегими  бла  белгиленнген организациялада финанс-экономика  болумгъа къаралырча кюн сайын мониторинг этилгенди. Бюгюнлюкде   аланы саны жетмишден артыкъды.  Ала промышленность, эл мюлк, жашау журт-коммунал мюлк, цифралы туризм, туризм,  санатор-курорт комплекс, транспорт эм жол мюлк бёлюмле бла байламлыдыла.

Аны бла бирге былтырдан бери   предпринимательлеге налоглагъа преференцияла да бериледиле.  Анга кёре, былтыр сегиз минг предприниматель налогну аз ёлчем бла неда артда тёлерге эмда  бир къауумундан, ол санда страховкадан  къутулургъа онг тапхандыла.    Дагъыда МСП-ны 362  субъеклерине ортакъгъа тёлеген налогларына льготала берилгендиле – тёлемезча, артда тёлерча эм аз тёлерча.  Ахча болушлукъну да субсидия халда  беш минг адам алгъанды. Алагъа микрозайм, ёнкюч эм лизинг  борчларын да    реструктуризация этилирча болушлукъ берилгенди.  Аны бла бирге 400 чакълы   билдириу-эгертиу себеплик да  этилгенди.

Магометланы Сулейман.
Поделиться: