Къабарты-Малкъарда ишчи кюнле башланнгандыла

Республикада ишлемеген кюнлени созаргъа мурат этмейбиз, дегенди Къабарты-Малкъарны Башчысы Казбек Коков «мунипал сагъатны» бардыргъан кезиуде. 

«Арт ыйыкъда регионда  коронавирусдан ауругъанланы саны артыкъ бек ёсмегени эсленеди. Дарман салдырыуда  да кёрюмдюле  игидиле.  Анга да къарамай, профилактика ишни тохтамагъанлай бардыргъанлай турургъа керекди, QR-кодланы  жюрютюуню да эсепге къаты алып.  Ишлемеген кюнлени созаргъа сюймей эдим, республикада жашауну болумун да бузмай»,- дегенди Казбек Коков.   КъМР-ни Башчысы жыйылыугъа къатышханланы халкъ бла ангылатыу ишни андан ары бардырыргъа буюргъанды эм дарман салдырыуну магъанасын ангылата, ол амал  адамланы ёлюмден эм аурууну эм къыйынындан сакъларгъа болушуругъун  чертгенди.  

Ыйыкъ сайын муниципал къуралыуланы таматалары бла бардырылыучу тёрели жыйылыугъа КъМР-ни Правительствосуну таматасы Мусукланы Алий, КъМР-ни саулукъ сакълау министри  Рустам Калибатов къатышхандыла.

«Муниципал сагъатда» миллет эм регионал проектле  районлада къалай бардырылгъанларына, эпидемиология болум не халда болгъанына, дарман салдырыу къалай баргъанына, коронавирус инфекцияны жайылыуун тохтатыу  бла байламлы къаллай амалла этилгенлери сюзюлгендиле.

Жыйылыуну кезиуюнде 23 октябрьде школлада башланнган каникулла 7 -чи ноябрьде бошаллыкълары да айтылгъанды. Сегизинчи ноябрьден тебиреп, билим берген учреждениялада эм сабийлени спортха юйретген организациялада ишлерин тёрели халда башларыкъдыла.

Адамла ишге чыкъмагъан ыйыкъ бошалгъанды, биригиуле бла учрежденияла тёрели халда ишге тохташхандыла.

 Аны бла бирге, санитар-эпидемиология излемле тюрленмейдиле, ала Оперативный штабны оноуу бла 20 октябрьде кийирилген эдиле.

Алыкъа  культура учреждениялагъа, ашханалагъа, къонакъ юйлеге, канат жоллагъа, бассейнлеге, тюрлю-тюрлю салонлагъа, сауналагъа, фитнес -аралагъа, спорт заллагъа баргъанда QR-кодланы бла ПЦР тестлени  хайырланыргъа кереклиси сакъланады. QR-кодланы бла ПЦР тестлени ЗАГС юйледе къырал регистрацияны жабыкъ отоулада къууанч халда этгенде кёргюзтюрге керекди.

 Адамла аслам халда жыйылгъан жерледе медицина маскалада болургъа кереклиси, сюелгенле   бир-бирден узагъыракъ турургъа эм къолларын  дезинфекция  этерге кереклиси баямды.

 Колледжлеге (лицейлеге) эм къошакъ халда билим берген организация лагъа окъуу-юйретиу ишни дистанция амал бла бардырыргъа онг бериледи. Аслам халда эмда къауумла болуп окъуучулагъа тышына барып  мероприятияланы ётдюрюрге жарамайды.

 Ишлемеген эм  дарман салдырмагъан  (ол санда медицина къагъытлары болгъанлагъа) 60 жыл толгъан эм  андан да абадан инсанлагъа, ол санда сагъынылгъан жыл санлары болгъанлагъа, коронавирусдан ауруп  алты ай мындан алгъа иги болгъанла , самоизоляцияда турургъа керекдиле, башхача айтханда, жашагъан  жерлеринден кетмей, бир  уллу сылтау чыкъмаса.

Иш бериучюлени дарман салдырмагъан ишчилени кюн сайын ишге жюрюрге жарамагъан излемлери сакъланады. Жыл санлары алтмыш жылдан атлагъанланы ёпке эм жюрек ауруулары болгъанла, эндокринный системалары къыйнагъанла, тёрт неда алты ыйыкъгъа дери дистанция амал бла ишлерге кетедиле. Ала коронавирусха къажау  дарман салдырыуну (аллай этерге жарай эсе) ётерге керекдиле.

 Республикада коронавирусха къажау ишни бардырыргъа битеу онгла къуралгъандыла.  Шёндю дарман салдырыучу 83 жер барды. Вакцинацияны битеу да 529,3 минг адам ётерге керекди. Саулай да   битеу дарман салдыргъан курсну 148 750 минг адам ётгенди, дарманны биринчи компанентин 214 716 минг адам салдыргъандыла.

 Саулукъ сакълау министрни билдириуюне кёре, озгъан суткалагъа Къабарты-Малкъарда 2513 минг ПЦР-тест  этилгенди, жангы коронавирус инфекция бла ауругъан 133 адам ачыкъланнганды.

 Компьютер томографияны 402 адам этдиргенди, вирус пневмониясы болгъан 260 адам чыкъгъанды. Алты госпитальда 1613 ундурукъ барды. Арт кюнледе ауур халда госпитальлагъа 97 адам тюшгенди. Шёндю къоркъуулу инфекцияланы бакъгъан больницалада жатханланы  саны 1493-ге  жетгенди, аладан жартысыны хауалары жетишмей къыйналгъанлагъа саналадыла.

 Реанимацияны бёлюмлеринде 151 адам жатады, аладан онтогъузусу ИВЛ аппаратлагъа  къошулупдула,    101 – НИВЛ   аппаратлагъа.   Амбулатория амал бла 5392 адам багъылады, аланы жартысы коронавирусдан ауругъанлары лаборатория халда белгили болгъанды. Озгъан суткалада госпитальлада  98 адамны багъып, юйлерине ийгендиле.   

Поделиться: