Къабарты-Малкъардан студент – саугъаны иеси

«Росспецмаш» ассоциация, ол а А.А. Ежевский атлы миллет саугъаны къураучусуду, Россейни Минпромторгуну себеплиги бла бардырылгъан  эл мюлк машиностроение жаны бла жаш конструкторланы  араларында жыл сайын ётген эришиуде хорлагъанланы атларын белгили этгенди.

Премияны лауреатлары 11 студент болгъандыла, ала Къабарты-Малкъар Республиканы, Приморский, Пермь, Краснодар крайланы , Пенза, Кемеров, Ульянов эм Челябинск областьланы вузларыны атларындан эришгендиле, деп билдириледи ассоциацияны сайтында.

Къабарты-Малкъар Республиканы атындан В.М. Коков атлы къырал аграр университетни 4-чю курсуну студенти Ренат Карданов жетишимли чыкъгъанды.  Жаш инженерни проекти террасированный халлы тикледе орналгъан бахчалада топуракъгъа себеплик этилирча комбинированный агрегатны жарашдырыугъа жораланнганды.  Аны илму башчысы техника илмуланы доктору, «Техническая механика и физика» кафедраны профессору Лиуан Хажметовду.

Хорлагъанланы эл мюлк техниканы чыгъарыу жаны бла алчы россей заводланы, «Росспецмаш» Ассоциацияны, НАМИ ФГУП-ну таматаларындан, Россейни Минпромторгуну, Эл мюлк техниканы бла технологияланы сынаучуланы ассоциациясыны, специализированный СМИ-лени келечилеринден къуралгъан жюри белгилегенди. Экспертле проектле эл мюлк машиностроенияны айныууну шёндюгюлю ызларына келишгенлерни чертгендиле.

Информацияда белгиленнгенине кёре, заводланы таматалары Россейде фахмулу инженер-конструкторла болгъанларын кёредиле, эм эришиуню эсеплерине кёре ол жаш адамланы мындан арысында иш бла жалчытыу амаллагъа къараргъа хазырдыла.

Лауреатланы багъалы саугъала эм ахча премияла бла байрам халда белгилеу Дондагъы Ростовда Ростсельмаш компанияны тийресинде боллукъду. Эришиуде алчыла предприятияны производстволу майданлары бла шагъырейленирикдиле, конструктор бюрону келечилери бла ушакъла бардырлыкъдыла, жашауда бардырылгъан уллу инвестиция проектлени кёрлюкдюле.