Кишилиги, жигерлиги бла да юлгю болгъанлай къалгъанды

Кёп болмай Къумукъланы Камила, редакциягъа сёлешип, аппасы Къумукъланы Къурманны жашы Ибрагимни юсюнден газетде басмаларыбызны тилегенди. Ол аппасыны юсюнден толуракъ хапар да билдиргенди.

Къумукъланы Ибрагим 1911 жылда 11 майда Быллымда туугъанды. Уллу Ата журт уруш башланнгынчы Тырныауузда ишлеп тургъанлай, аскерге чакъырылгъанды. Уруш башланнганда уа, аны Ставропольгъа аскер училищеге жибередиле, андан а фронтха кетеди.

Жигит таулу жаш сапёрланы батальонунда къуллукъ этгенди, кёп баш магъаналы сермешлеге къатышханды, уруш жолун сержантдан башлап офицер чыны бла бошагъанды. Уллу къазауатладан биринде жаралы болгъанды, 4 кере контузия алгъанды. 7 минг чакълы мина салгъанды, душманны да 4 мингден аслам минасын жараусуз этгенди.  

Ибрагимни урушда этген кишилиги ючюн ол Ата журт урушну экинчи даражалы орденине тийишли кёрюлгенди. Ол орден а аскер операцияла хорлам бла бошалырларына себеплик этген, батырлыкъ да болдургъан аскерчилеге берилгенди. Аны къанлы къазауатда таза да кишилик этгенине дагъыда Къызыл Жулдузну ордени, «За отвагу», «Кавказны къоруулагъаны ючюн», «Германияны хорлагъаны ючюн» майдалла да шагъатлыкъ этедиле. Была уа Ибрагимни  РФ-ни Къоруулау министерствосу ачыкълагъан саугъаларыдыла. Аны юсюнден шартланы кёбюсю энтта да жашырынлыкъда турадыла эмда РФ-ни Къоруулау министерствосуну баш архивинде сакъланадыла.  

Уруш бошалгъандан сора Къумукъланы Ибрагим Украинада тохтайды. Анда аны колхозну председателине да саладыла. Ауукъ замандан а Быллымгъа къайтып, анда Эл советге таматалыкъ этгенди. Жазаланы Аубекирни къызы Роза бла беш жаш бла бир къыз ёсдюргендиле. Чынтты таулу киши, ишден арый-тала билмеген Къумукъланы Ибрагим 1985 жылда ауушханды. Кишилиги, жигерлиги бла да ёсюп келген тёлюге юлгю болгъанлай къалгъанды.