Шимал Кавказда жолланы айнытыуну къайгъысын этгендиле

Федерал жол Агентствону башчысы Роман Новиков кёп болмай СКФО-гъа келгенди. Пятигорскеде болгъан кезиуюнде, ол регионланы башчылары бла тюбешип, аланы жоллагъа къарагъан «Кавказ» Управленияны жангы таматасы Александр Лукашук бла танышдыргъанды. Ызы бла кенгеш бардырып, Ставрополь крайда, Къабарты-Малкъарда эмда Къарачай-Черкессияда жолланы айнытыуну юсюнден сёлешгенди.

Агентствону башчысы кесини ал сёзюнде СКФО-да регионла бары да жоллагъа къарау жаны бла иги къармашханларын белгилегенди. «Шимал Кавказ ючжыллыкъ программаны тынгылы тамамлагъанды. Мурдорлу сетьге узунлугъу битеуда 5,3 минг километр болгъан алтмыш жол киргенди. Ол санда 2,8 минг километрден артыгъы федерал жолладыла, къалгъанлары уа регионланы эмда жер-жерли власть органланы бойсунуунда болгъан объектледиле», - дегенди Роман Новиков.

Жыйылыугъа къатышханла эм магъаналы жол проектлени тамамлауну юсюнден сёлешгендиле. Сагъынылгъан сетьге кирген объектлени эм азындан 85 процентин тийишли излемлеге келтириуню эмда жолланы тёрт ызлы этиуню баш борчха санагъандыла. Сёз ючюн, Ставрополь крайда Минеральные Воды – Кисловодск А-157 трассаны (40 километр) эки участкасы аллайла боллукъдула.

«Бизни регионда бек тири хайырланылгъан жол ма олду. Курорт шахарлагъа – Железноводскеге, Кисловодскеге, Ессентукиге кёпден кёп турист келеди. Трассаны тёрт ызгъа дери кенгертгени ючюн Росавтодоргъа ыразылыгъымы билдирирге сюеме», - дегенди Ставрополь крайны башчысы Владимир Владимиров.

Быллай ишле Къабарты-Малкъарда Р-127 «Кавказ» трассада да бардырыладыла. Быйыл май айда анда он километрлик кесеги тёрт ызлы болгъанды. Энди уа тийишли ишле Эски Черекде бла Аргунданда 14-километрлик участкада бардырыладыла. Ол кеси да быйылны ахырында битерикди. Бу кезиуге Минги тау таба баргъан федерал жолда къоруулаучу объектлеге да тынгылы ремонт этилип бошаллыкъды.

«Республикада жоллагъа аслам эс бургъанлары ючюн Росавтодорну башчыларына ыспас этеме. Къабарты-Малкъарда власть органла бары да ведомство бла бирге ишлерге, битеу салыннган борчланы къыйматлы тамамларгъа хазырдыла», - дегенди Казбек Коков.

Къарачай-Черкес республиканы юсюнден айтханда, анда бары да бирге 25 километр болгъан талай участканы тёрт ызлы этиу ишле эбине жете турадыла. Пятигорскени жанындан бара Черкесскге кирген тийреде кёчерге боллукъ жер да кетериле турады. Жолчула келир жыл алайны тёрт ызлы этерикдиле эмда Черкесск – Домбай трассада эки кёпюрню тынгылы жангыртыргъа таукелдиле. Республиканы башчысы Темрезланы Рашид регионда жоллада аслам иш этилгенин, тийишли инфраструктура жангы, кеси да шёндюгю излемлеге келишгени – социал-экономика сфераны, туризмни да айнытыугъа, инвестицияланы келтириуге бек уллу себеплик этгенин чертгенди.

Шимал Осетияны башчысы Сергей Меняйло бла тюбешгенинде, Роман Новиков Р-217 «Кавказ» трассаны Владикавказны къаты бла баргъан кесегинде бардырыла тургъан къурулуш эмда реконструкция ишлени юсюнден сёлешгенди. Бу проект быйыл башланнганды. Ол тамам этилсе, регионну ара шахары транзит транспортдан эркин боллукъду. «Федерал агентство Чикола эмда Архонская эллени къатларында жолланы ишлеуде эмда Мамисон, Цей эм Кармадон курортлагъа элтген жолланы реконструкциясында да болушуруна ышанабыз», - дегенди субъектни башчысы.

Ингушетияны башчысы Махмуд-Али Калиматов бла Роман Новиков Магасда тюбешгенди. Ала быйыл эмда келир жыл бардырыллыкъ «Къоркъуусузлу эмда тап автомашина жолла» деген Миллет проектге кирирге тийишли болгъан объектлени юслеринден хапарлагъандыла, жоллада къоркъуусузлукъну кючлендириуню юсюнден да сагъыннгандыла. Тергеулеге кёре быйыл январьдан башлап октябрьге дери, озгъан жылны ол кезиую бла тенглешдиргенде, бу республиканы жолларында болгъан осал транспорт болумланы саны ючден бирине азайгъанды. Алада ауушханланы саны – 25, жаралы болгъанланы уа - 9 процентге. Махмуд-Али Калиматов гражданланы къоркъуусузлугъун эмда алагъа тап болумла къурауну эм башына салгъанды. «Аны себепли бизни регионда жашагъанла хал жылдан жылгъа игилене баргъанын сезедиле. Жолланы жанларында сервисни айнытыуну, «Кавказ» трассаны тап халгъа келтириуню да эсде тутабыз», - дегенди ол.

Чечен Республиканы башчысы Рамзан Кадыров бла Росавтодорну башчысы Грозныйде тюбешгенди. Бюгюнлюкде бу регионда Р-217 «Кавказ» трассаны Гудермесни жаны бла озгъан кесеги ишлене турады. Объектни биринчи участкасы 2015 жылда берилген эди хайырланыугъа. Буруннгу жылны ахырында уа экинчи кесеги битгенди. Саулай а объект 2023 жылда хазыр боллукъду.

Улбашланы Мурат хазырлагъанды.
Поделиться: