«Жылны устазы-2021» Битеуроссей эришиуню лауреаты Карина Кушхова - къыралны эм иги педагогларыны санында

Къабарты-Малкъар Республиканы Башчысы Казбек Коков Майский шахарны битеулю билим берген школуну ингилиз тилден устазы Карина Кушхова бла тюбешгенди, ол быйыл октябрьде «Жылны устазы-2021» Битеуроссей эришиуню лауреаты болгъанды, Россейни 15 эм иги устазыны санына къошулгъанды. Тюбешиуге КъМР-ни жарыкъландырыу, илму эм жаш тёлюню ишлери жаны бла министри Анзор Езаов да къатышханды.

КъМР-ни Башчысы Карина Кушхованы бийик жетишими бла алагъышлап, келлик тёлюню юйретиуде къыйыны эм тири граждан кёз къарамлары ючюн ыразылыгъын билдиргенди. «Бизге устазны усталыгъы бек магъаналыды, аланы ишлерини болумларын игилендирирча къарыуубуздан келгенни аямазгъа кюрешебиз, квалификацияларын ёсдюрюу соруулагъа эс бурабыз эм быллай эсепле Къабарты-Малкъаргъа бек магъаналыдыла», - деп белгилегенди Казбек Коков.

Республиканы оноучусу бла ушакъда Карина Арсеновна былай дегенди: «Манга бу эришиу квалификациямы ёсдюрюуде ахшы сынамды, педагогча айныуумда да энчи шартды. Регион даражада уллу команда ишни бардыргъанбыз, кесимлей ол жумушну тындыраллыкъ тюйюл эдим. Бек уллу сынамды, ол мени жюрегимде сакъланырыкъды, къууанама аллай эришиуге къатышханыма».

Анзор Езаов эришиуню муниципал эм регион кезиулерини юсюнден хапарлагъанды. Регион даражада алчы муниципалитетледе хорлагъан 13 устаздан сайланнганды. Алагъа мастер-классланы сынамлы специалистле бардыргъандыла, иш Учительская газета бла, ол а Россейни Жарыкъландырыу министерствосуча «Жылны устазы» Битеуроссей конкурсуну учредителиди, байламлыкъда къуралгъанды.

Былтыр «Жылны устазы» Битеуроссей конкурсну эсеплерине кёре, «Учительская газетаны» энчи саугъасы Къабарты-Малкъардан башха педагогга – Тырныаууз шахарны 5-чи номерли гимназиясыны физкультурадан устазы Фуад Бурановха – коррекциялы къауумла эм саулукъларында чекленнген онглары болгъан сабийле бла ишлегени ючюн берилгенди. Министр билдиргенича, конкурс бардырылгъан битеу кезиуледе, быйыл ол 32-чи кере къуралгъанды, Къабарты-Малкъарны атындан анга 23 устаз къатышханды, аладан алтысы даражалы эришиуню лауреатлары болгъандыла.

Тюбешиуню чеклеринде республикада билим бериуню къуралыууну тюрлю-тюрлю соруулары сюзюлгендиле. Алып айтханда, сёз сабийни юйретиуде устазны магъаналылыгъыны юсюнден болгъанды «Устаз – ол тамблагъы кюнню архитекторуду, сабийни юйретиуде хар затха эс бурургъа тийишлиди, аны эшитирге керекди, жууаплылыкъны да ангыларгъа», - дегенди Карина Кушхова. Казбек Коков билим бериуден сора да, жаш адамланы бизни къыралны къыйматларына кёре тюз инсанланыча юйретиу бек магъаналы болгъанын чертгенди. «Бюгюнлюкде Россейни Президенти Владимир Владимирович Путин жаш тёлюню юйретиуню билим бериуню борчуна салыргъа тиийишлисин айтханды», - деп эс бургъанды Башчы.

Казбек Коков Карина Кушхованы школлада юйретиу ишни игилендириу жаны бла предложенияла къурарча республиканы педагогларыны араларында соруу бардырыргъа тийишлиди деген башламчылыгъын дурус кёргенди. Педагог «Жылны устазы» эришиуню регион кезиуде даражасын кётюрюрге тийишли болгъанын да белгилегенди, аны ол оюму бла Башчы да толусунлай келишгенди.

Тюбешиуню ахырында Къабарты-Малкъарны Башчысы «Жылны устазы» эришиуню муниципал, регион эм федерал урумларына къатышхан эм жетишимле болдургъан педагоглагъа ыразылыгъын билдиргенди.

Эсигизге салайыкъ, быйыл КъМР-ни Башчысыны указы бла 2020-2021 окъуу жыллада школ олимпиадалада хорлагъанладан сора да, сабийлени хазырлагъан устазлагъа да премияла буюрулгъандыла, аланы 56 педагог ишчи алгъандыла.  Андан сора да, быйыл КъМР-ни Башчысы Казбек Коковну буйрукъларыны чеклеринде республиканы устазларыны хакълары 10 процентге ёсгенди, бюджетчилени айлыкъларын кётюрюу программа юч жылгъа тамамланырыкъды.

Поделиться: