Къабарты-Малкъарны къуралыууну 100-жыллыкъ байрамына хазырланыу жумушлагъа - энчи эс

КъМР-ни Башчысы Казбек Коков 2022 жылда бардырыллыкъ Къабарты-Малкъар Республиканы къуралыууну 100-жыллыкъ байрамына хазырланыу жаны бла къурау комитетни жыйлыуун бардыргъанды. Анга КъМР-ни Правительствосуну Председатели Мусукланы Алий, аны орунбасары Марат Хубиев, КъМР-ни маданият министри Мухадин Кумахов, КъМР-ни транспорт эм жол мюлк министри Аслан Дышеков, КъМР-ни къурулуш эм ЖКХ министри Алим Бербеков, КъМР-ни цифралы айнытыу министри Ислам Ашхотов, КъМР-ни Башчысыны кенгешчиси Вячеслав Кунижев, Нальчик шахар округну жер-жерли администрациясыны таматасы Таймураз Ахохов къатышхандыла.

Юбилей датагъа аталгъан жумушланы планын жашаугъа кийириуню чегинде 2020 жылда 9 маданият юйге, 7 китапханагъа, 4 музейге, 2 театргъа, къол усталыкъланы арасына ремонт этилгенди. Быйыл 5 маданият объектни ремонту бардырылады, 2022 жылда энтта 9 маданият учрежденияны ремонту пландады. Казбек Коков жылны ахырына республиканы Правительствосуна экинчи жылгъа планнга салыннган ишлени контрактациясын этерге буюргъанды, ремонт ишле 2022 жылда 1 сентябрьге ахырларына жетерча.

Мухадин Кумаховну билдиргенине кёре, ноябрьде А. Шогенцуков атлы Къабарты къырал драма театрда Р. Добаговну «115-я Кавалерийская дивизия» спектаклини премьерасы къураллыкъды. Къулийланы Къайсын атлы Малкъар къырал драма театрда В. Шекспирни «Отелло» пьесасыны постановкасы ахырына жете турады. М. Горький атлы орус драма театрда А. Чеховну «Дядя Ваня» пьесасыны постановкасы тамамланнганды, декабрьде Къырал музыка театр А. Шогенцуковну «Камбот и Ляца» романына кёре операны премьерасын къурарыкъды. Къабарты-Малкъар Республиканы къуралыууна жораланнган телевидение фильмлени алдырыу, адабиятны тинтиу, чыгъарыу эм жангыдан басмалау жаны бла ишле бардырыладыла.

Министр дагъыда бир ненча маданият-асламлы жыйлыуланы бардырылмагъанлары ючюн, РФ-ни Маданият министерствосу бла келишип, алагъа къоратылмагъан ахчаны Жашил театрны, Май районну Тарых-краеведение музейини, Б. Пачев атлы Юй-музейни, Т.К. Мальбахов атлы къырал миллет китапхананы мекямларыны ремонт ишлерине бёлюннгенин айтханды. Жашил театрны мекямыны, Къырал концерт залны, «Спартак» стадионну, Прохладнада шахар маданият юйню ремонтлары башланнганды, Адабият музей жангыртылыулагъа хазырлана турады.

Казбек Коков юбилей датагъа жораланып къураллыкъ жумушланы хазырлауда тийишли амалланы жарашдырыуну магъанлылыгъын белгилегенди. Кенгешге къатышханла бла Башчы Москвада Къабарты-Малкъарны кюнлерин бардырыуну, республиканы ара шахарына кирген жерледе стелаланы проектированияларын эм къурулушларын, кёп фатарлы юйлени тынгылы ремонтларын, жол къурулушну эм жамауат тийрелени тапландырыуну сорууларын сюзгенди. Республиканы таматасы Къабарты-Малкъарны юбилейине аслам проект бардырыллыгъын чертгенди, аны себепли ишлени заман болжалларына эм качестволарына тийишли контрольну жалчытыу магъаналыды, дегенди.    

Поделиться: