Ата-аналадан энчи контрольну излегендиле

Огъары Жемтала элни орта школунда, ата-аналаны жыйып, Интернетден чыгъаргъа боллукъ къоркъуулу кезиулени сюзюу бардырылгъанды. Ол тюбешиуге Черек районну билим бериу эм жаш тёлюню ишлери жаны бла управлениясыны таматасы Безюланы Ахмат, РФ-ни Ич ишле министерствосуну Черек райондагъы ОМВД-ны таматасыны орунбасары Аслан Озермегов эм дагъыда башха жууаплы структураланы келечилери къатышхандыла.

Сёлешгенлени хар бири да сабийлени интернетге кириулери не ата-аналаны тийишли контроль болмагъанын чертгендиле. Аллай сансызлыкъ школчуланы жарсыулу ишлеге келтиргенини юсюнден арт кезиуде терк-терк эшитирге тюшеди. Аманлыкъчыла къурагъан къауумлагъа къошулуу эмда оюнла ойнау, сезимлери къатмагъан сабийлени терс атламлагъа итиндиредиле. Ол себепден ала бла юйюрлеринде хаман сёлешгенлей, игини бла аманны орталарын белгилерге керекди.

Тюбешиуге келгенле 14 жыллары толмагъан сабийлеге смартфонла алмазларын тилегендиле. Компьютерледеги оюнлагъа да заман бла чек салыргъа чакъыргъандыла. Быллай тюбешиуле районну битеу билим берген учрежденияларында ётгендиле.

Интернет бла байламлы жарсыулары болгъанла бла бюгюнлюкде Нальчикде "Сабий эм жаш тёлю чыгъармачылыкъны арасында" орналгъан служба ишлейди. Андагъы специалистле терк халда болушлукъ тапдырадыла.

 

Къасымланы Аминат.
Поделиться: