Ал жанында – сабийли юйюрлени къолайлыкъларын игилендириу

Бу кюнледе КъМР-ни Парламентини Урунуу, социал политика эмда саулукъ сакълау жаны бла комитетини уллу жыйылыуу болгъанды. Анда сёз сабийли юйюрлени къолайларын игилендириуню юсюнден баргъанды. Анга КъМР-ни Парламентини Председателини орунбасарлары Жанатайланы Салим бла Мурат Карданов, КъМР-ни Башчысыны бла Правительствосуну Парламентде бла сюд органлада келечиси Мадина Дышекова, социал къоруулауну органларыны, КъМР-ни Парламентинде Жаш тёлю палатаны келечилери да къатышхандыла.

Жыйылыуну ача, комитетни таматасы Хусейн Кажаров сюзюллюк тема бек магъаналы болгъанын, РФ-ни Президенти Владимир Путинни бла КъМР-ни Башчысы Казбек Коковну Посланияларында ол баш борчладан бирича белгиленнгенин чертип айтханды. 

Андан сора КъМР-ни урунуу эмда социал къоруулау министрини орунбасары Елена Романова сёлешгенди эмда юйюрлю сабийлеге не болушлукъ этилгенини юсюнден билдиргенди. КъМР-ни Правительствосуну «КъМР-ни халкъына социал болушлукъ этиуню» 2013-2020 жыллагъа жарашдырылгъан республикалы къырал программасыны юсюнден» бегимине тийишлиликде, 2008 жылда 1 январьдан сора туугъан бешинчи сабий неда аны ызындан келген балачыкъла ючюн  аналыкъ ахчаны регион ёлчеми неда жашау болумну игилендирирге деп бир кере 250 минг сом бериледи.

Быйылны тогъуз айына адрес социал болушлукъ алыргъа эркинлик берген сертификатла 143 юйюрге юлешиннгендиле. Жашау журтларын кенгертирге деп берилген социал болушлукъну кёп сабийли юйюрледен 154-сю алгъанды. Анга битеу да 33 миллион 125 минг сом бёлюннгенди.

Кёп сабийли юйюрлеге тутхучлулукъ этер эмда даражаларын кётюрюр муратда республикада къырал саугъа тохташдырылгъанды – «Ана махтаулукъну» майдалы. Аны бла саугъаланнганлагъа хар сабий ючюн 10 минг сом тёленеди. Он эм андан да кёп сабий ёсдюргенлеге уа микроавтобус да бериледи. 2008 жылдан башлап 2020 жылгъа дери «Ана махтаулукъну» майдалы бла 347 тиширыу саугъаланнганды, аладан 40-сы «Газель» микроавтобус къоллу болгъанды.

Жыл сайын жангы окъуу жылны аллында сабийлеге болушлукъгъа битеуреспубликалы субботник бардырылады. Жыйылгъан ахча кёп сабийли эмда къолайсыз юйюрлеге сабийлерин школгъа хазырларгъа бериледи. Быйыл 1 октябрьге 3569 школчуну ата-аналарына 7 миллион 138 минг сом юлешиннгенди, хар сабийге 2 минг сом жетерча этилгенди. 

Сабийли юйюрлеге къырал пособияланы тёлеу жаны бла иш да андан ары бардырылады. Пособияланы бир система бла 92,7 минг адам 120,9 минг сабийге аладыла. Биринчи сабий туугъанда (ёсдюрюрге алыннганда) ай сайын ахча тёлеу да тохтатылмагъанды. РФ-ни Президентини «РФ-да демография политиканы жашауда бардырыуну юсюнден» Указына тийишлиликде, ючюнчю эм андан да кёп сабий туугъанда, анга юч жыл толгъунчу ай сайын ахча тёленнгенлей турады. Тогъуз айны ичинде аллай пособие 4823 юйюрге (5232 сабийге) берилгенди.

Дагъыда школгъа дери билим бериуню программасы бла ишлеген учреждениялагъа жюрюген сабийле ючюн ата-анала тёлеген хакъны бир кесегин къайтарыу жаны бла иш да андан ары бардырылады. Тогъуз айгъа 3061 юйюрге (3967 сабийге) 18 миллион 380,02 минг сом къайтарылгъанды. Быйыл 1 январьда кючлерине кирген тюрлениулени эсге алыу бла 3-7-жыллыкълагъа ай сайын ахча тёленип турады. 

Докладчы юйюрлени бла сабийлени социал жумушла бла жалчытыучу учрежденияла къалай ишлегенлерини, жай солуу къалай къуралгъаныны юсюнден да билдиргенди. 

Сюзюлген теманы андан ары Черек эмда Зольск районланы, Прохладный шахарны бла Прохладный районну социал араларыны директорлары Батчаланы Алим, Масират Кушхова бла Наталья Иокерс бардыргъандыла эмда бютюн толу хапар билдиргендиле.

Кесини оюмун айта, Урунуу, социал политика эмда саулукъ сакълау жаны бла комитетни таматасыны орунбасары Владимир Безгодько пандемияны кезиуюнде тийишли министерствогъа бла аны бёлюмлерине уллу ауурлукъ жетгенин чертгенди. Аны бла бирге ол энчи эс бурургъа керек болгъан жумушланы да туура этгенди.

Парламентарийле да сёлешиулеринде регион льготаланы, социал контрактны, жашау журтланы кёп сакъларгъа тюшгенини, кёп сабийле юйюрлеге жер юлюшле бериуню, сабийлени жай солууларын къурауну эм кёп башха затланы юслеринден айтхандыла. 

Бир бирге оюмларын айтып, жыйылыугъа къатышханла тийишли структуралагъа эсгертиулени къабыл кёргендиле

Поделиться: