Комбинатны ток бла жалчытыргъа - 213 миллиондан аслам сом

Белгилисича, Тырныауузда вольфрам-молибден къазгъан комбинат 2023 жылгъа ишлеп башларча инвестициялы проект къабыл этилгенди. Аны бла байламлы энди объектни энергокюч бла жалчытырча къыстау мадар этиледи. Бу жаны бла комплекс халда тийишли ишлени «Россети Шимал Кавказ» Каббалкэнерго» компания бардырады.  

Ол санда 110 кВ ток баргъан ыз жангыртылады. Ол 2001 жылда предприятие ишин тохтатхандан сора 6 кВ классха тюшюрюлгенди. Специалистле бир чыпында юч фазалыкъ бийик ток эки ыз бла барырча амалны къурарыкъдыла. Андан сора да, «ЦРУ» подстанцияны да оборудованиясы жангыртылады.

Шахтагъа, комбинатны подстанция орналлыкъ 1700 бийикликге юч километр чакълы 110 кВ ыз тартыллыкъды. Белгиленнген жумушла тамамлансала, предприятияны 14 МВт энергокюч бла жалчытыргъа онг табыллыкъды. Ишлеге саулай 213 миллиондан аслам сом къоратыллыкъды.

Комбинат жангыдан ишлеп тебиресе Шимал Кавказда эм уллу предприятияладан бири боллукъду. Планнга кёре, жылгъа 1,5 миллион тонна магъадан чыгъарыллыкъды.