Коронавирус инфекцияны жайыла барыууна къажау мадарла кючлендириледиле

КъМР-ни Башчысы Казбек Коков республикада коронавирус инфекциядан ауругъанланы саны ёсюп баргъаны бла байламлы Къабарты-Малкъарны жеринде бир-бир ишлеге чек салыу мадарланы кючлендириуню юсюнден указгъа къол салгъанды. Ол 2021 жылны 15 октябринден башлап кючюне киреди.   

Документ КъМР-ни Башчысыны сайтында басмаланнганды. Анда кёп адам къатышхан жыйылыуланы, къууанчланы бардырыуну жорукълары тохташдырыладыла. Алай бла аллай ишлеге 50-ден артыкъ адам чакъырылмазгъа, ала бир бирге жууукъ жанламазгъа, бетлерине къапла салыргъа изленеди. Аны бла бирге кечеги клублада, солууну къурагъан башха жерледе адам кёп къатышхан той-оюн (дискотекала) бардырыугъа чек салынады.

Адамланы кёп  къатышхан (санына чек салынып) ишлени ачыкъ жерледе – зоопарклада, парклада, тирледе санитар жорукъланы толтуруу бла бардырыргъа боллукъду. Халкъ жыйылыула, уллу спорт эришиуле да ма ол халда къуралыргъа керекдиле. Битеу аллай ишлеге къатышханланы ПЦР-тестлери болургъа, ала аурумагъанларын кёргюзтюрге керекдиле.

Ашханаланы ишлери 23.00 сагъатдан келир кюн 06.00 сагъатха дери тохтатыладыла (ачыкъ жерде, вокзалланы, аэропортну, отлукъ станцияланы тийрелеринде ачыкъ жерледе, дистанция амал бла ишлегенлени къошмай). Сатыу-алыу аралада, сатыу-алыу-той-оюн комплекследе орналгъан ашханаланы, аш-азыкъ, сатыу-алыу объектлени тийрелеринде болгъан сабийле ойнаучу отоуланы ишлери да ауукъ заманнга тохтатыладыла.

Андан сора да, ЗАГС-да къууанчлы ишлеге 20-дан артыкъ адам (учрежденияда ишлегенлени къошмай) къатышмазгъа кереклиси тохташдырылады.

Сатыу-алыу, аш-азыкъ, къырал эмда муниципал жумушла тындырылгъан объектлеге келгенлени температураларын тинтирге борчлу этиледи. Ашханалада жерлерини 50 процентинден асламы хайырланмазгъа керекди, театрлагъа, концерт заллагъа, маданият юйлеге, кинотеатрлагъа (кинозалла) уа 75 процентден кёп адам жыймазгъа эмда ала бир бирден бир метрге узакъ болурча мадарла этерге тийишлиди.

Спорт эришиуле къараучула болмай эмда профилактика мадарла толтурулуп бардырылсынла (Роспотребнадзорну методика эсгертиулерине бла Россейни Спорт министерствосуну излемлерине кёре бардырылгъан уллу эришиуле бери къошулмайдыла).

Документде айтылгъаныча, башында сагъынылгъан ашханала, маданият юйле, спорт объектле ишлерин бардырыр ючюн, алагъа келгенлени (акъылбалыкъ болмагъанланы айтмай) QR-кодлары (вакцинациядан ётгенлерини юсюнден сертификатлары), таза ПЦР-тестлери (72 сагъат алгъа этилген) неда ахыр алты айда коронавирусдан ауруп сау болгъанларына шагъатлыкъ этген документлери болургъа керекдиле.

Поделиться: