Ёзек тема – тиширыуланы предпринимательликге кёллендириудю, къыралны жанындан тутхучлулукъну кючлендириудю

РФ-ни Федерация Жыйылыууну Федерация Советинде Евразиялы тиширыу форумну совети  «Россей – онгланы къыралы» президент платформаны «Сенеж» управлениясыны мастерскою бла бирге «Компас женского лидерства #МягкаяСила» деген кюндюзгю марафонну ётдюргенди. Аны мураты -регионлагъа, саулай къыралгъа да магъаналы борчланы сюзергеди, жетишимли оноучуланы юлгюлерин, ала жашауда бардыргъан проектлени да кёргюзтюргеди.

Марафон Россейни регионларыны ыйыгъыны чеклеринде 13-15 октябрьде Санкт-Петербургда бардырыллыкъ Ючюнчю Евразиялы тиширыу форумну аллында ётгенди. Анга   «Россей – онгланы къыралы» президент платформаны «Сенеж» управлениясыны мастерскоюну «Тиширыу-башчы» программасына кёре билим алып чыкъгъанла, Къырал Думаны депутатлары, россейли регионланы башчылары, «Лидеры России» конкурсда хорлагъанла эмда   «Россей – онгланы къыралы» АНО-ну проектлерине бла конкурсларына, Евразиялы тиширыу форумну советини пректлерине  киргенле, бизнесменле, жамауат организацияланы келечилери да  къатышхандыла.

16-сагъатлыкъ марафон Камчаткада башланып, къыралны кюнбатыш жеринде – Калининград областьда – бошалгъанды.  Марафонну Москвадагъы студиясында хар сагъатдан онлайн- эмда офлайн амалла бла къыралны регионларындан спикерле къошулгъандыла.

Бу ишге къатышханланы алгъышлай, РФ-ни Федерал Жыйылыууну Федерация Советини таматасы Валентина Матвиенко  марафонда сюзюлген  хар теманы бек магъаналыгъа санагъанды. Ала уа экология, инвестицияла, халкъла аралы партнёрлукъ эмда экономика байламлыкъла бла да байламлыдыла. Аланы араларында тиширыу илмуда бла бизнесде, тиширыу эмда цифра амаллагъа кёчюу, тиширыуланы «жашил экономикагъа» къатышыулары магъангалы темаладан бирлерине саналадыла.

Валентина Матвиенкону оюмуна кёре, марафонну баш магъанасы -  анда кёргюзтюлген проектле регионлагъа битеулю проблемаладан къутулууда партнёрла табыуду эмда тюрлю-тюрлю бёлюмледе уллу жетишимле болдургъан тиширыуланы сынамларын билиудю.

«Туризм эмда къол усталыкъ: тиширыу предпринимательликни айнытыуну онглары» деген темагъа жетгенде, аны сюзгенлеге  видеобайламлыкъла халда Къабарты-Малкъар Республиканы Парламентини Председатели Татьяна Егорова да къошулгъанды. Ол, марафоннга къатышханланы алгъышлай,  тиширыуланы жамауат, политика эмда экономика ишледе тири бола баргъанларын, бизни республикада аны ючюн кёп тюрлю мадарла этилгенлерин да чертип айтханды.

-Шёндю кётюрюлген тема уа бизни республикагъа артыкъда магъаналыды. Нек дегенде туризм - Къабарты-Малкъарны айнытыуну баш амалларындан бириди. Алай аны башха магъанасы да барды. Мен туризмни айнытыу халкъланы жууукълашдырыргъа, бир бирни ангыларгъа, культураланы байыкъландырыргъа себеплик этгенини юсюнден айтама.

Арт жыллада республикагъа келген туристлени саны ёсгенди. Пандемия бла байламлы къыйын болумлада окъуна Къабарты-Малкъарда солургъа сюйгенле кёпден-кёп бола барадыла. Ма мында тиширыу предпринимательликни  бардырыргъа, ол санда халкъ чыгъармачылыкъны болушлугъу бла айнытыргъа, уллу онгла бардыла, - деп чертгенди Татьяна Егорова.

Ол къол усталыкъны туристле эс бурургъа боллукъ тюрлюлерини, бизде солургъа не жерлеге барыргъа боллугъуну, «Россейни тиширыу предпринимательлерини ассоциациясы» битеуроссей жамауат организацияны регион бёлюмю бардыргъан ишлени, ол санда гитче эмда орта предпринимательлеге не болушлукъ этилгенини, бизнесмен тиширыулагъа къаллай онгла берилгенлерини юсюнден хапарлагъанды. Ол санда Халкъ чыгъармачылыкъны республикалы арасыны ишини юсюнден да айтылгъанды.

КъМР-ни Парламентини спикери айтханнга кёре, тиширыуланы предпринимательликге кёллендирир мурат бла Къабарты-Малкъарда «Тиширыуланы къоллары бла» деген кёрмючле къураладыла, халкъ усталаны къолларындан чыкъгъан затла квартал сайын кёргюзтюледиле.

- Тиширыу бизнес ата журтлу товарланы эмда халкъгъа жумушла этиуню рыногунда конкурентликни айнытыугъа себеплик этеди. Алай а, тиширыуларыбыз не билимли, не уста, не иш кёллю да болсунла, къыралны жанындан болушлукъ болмай, тиширыу предпринимательликни жаяр амал жокъду… Бюгюнлюкде тийишли мадарла этиледиле, алай ала бла чекленип къалыргъа жарарыкъ тюйюлдю. Аны ангылап, биз тиширыу предпринимательликге къырал болушлукъну жангы амалларын излерикбиз, - дегенди сёзюню ахырында Татьяна Егорова.

Марафонну кезиуюнде гитче эмда орта бизнесде культура, адет-тёреле, къонакъбайлыкъ, жер-жерлени энчиликлери бла байламлы проектле сюзюлгендиле, къырал болушлукъну онгларына да къаралгъанды.

Поделиться: