Прохладный-Эльхотово жол жангыртылып башланнганды

Къабарты-Малкъарны Башчысы Казбек Коков жангыртылып башланнган Прохладный-Эльхотово жолгъа барып къарагъанды. Бу объектни узунлугъу 9,4 километрди болады. Ол Майский бла Прохладный шахарланы байлайды.

Эсигизге сала айтсакъ, быйыл июнь айда Башчы бу объектни тынгылы жангыртыргъа буйрукъ берген эди. Жумушну тындырыр ючюн къаллай бир ахча керек эсе да, федерал власть органланы эмда Росавтодорну себеплиги бла аны да иши этилгенди.

Ызы бла Казбек Коков объектде, КъМР-ни транспорт эмда жол мюлк министри Альберт Дышеков, подряд организацияланы башчылары да къатышып кенгеш бардыргъанды. Ала иш къалай барлыгъын, анда къаллай технологияла хайырланыллыгъын сюзгендиле, жол мюлкню айнытыуну юсюнден да хапарлагъандыла.

Прохладный-Эльхотово жол бла кюн сайын онтёрт минг чакълы машина ётеди. Анга кёре асфальт да терк ашалады. Объектни магъанасы уа бек уллуду. Ол Ставрополь крайгъа, Шимал Осетиягъа, Ингушетиягъа, башха регионлагъа да элтеди.

Министр билдиргенича, бу трасса биринчи категориягъа киреди, аны себепли анда тёрт ыз болургъа, кенглигин да 20 метрге жетдирирге тийишлиди.

Объектде къаллай ишле бардырылыргъа кереклиси былтыр окъуна белгили болгъан эди. Этер зат а кёпдю. Жолчула эски асфальтны толусунлай къырып кетерликдиле, ызы бла аула салып юч къатлы асфальт жаярыкъдыла. Иш кюзде эмда къышда бардырыллыкъды. Айтханларына кёре, кюнню халы анга чырмаулукъ этерик тюйюлдю.

Жолчула билдиргенлерича, бу объектде автобусла тохтаучу жерле да боллукъдула. Дагъыда тротуарла жарашдырыллыкъдыла эмда эки кёпюр жангыртыллыкъды. Къоркъуулу жерледе темирден буруула, суратха эмда видеогъа тюшюрген комплексле орнатыллыкъдыла, жолну саулай узунлугъунда уа белгиле эмда асфальтда ызлыкъла да салынырыкъдыла.

Ремонт баргъан кезиуде анда мониторинг бардыргъан пункт ишлерикди. Хар неге да онлайн-халда контроль этилликди, бу ишге тышындан экспертле да къатышырыкъдыла.

Ахырында Казбек Коков былай айтханды: «Бу жолну жангыртып, биз районларыбызны арасында транспорт тап эмда къоркъуусуз жюрюрча этерикбиз. Къоншу регионладан келгенлеге да иги боллукъду. Мында хар неда тийишлисича этилсе, андан арысында энтта да ахча келирине ышаныргъа боллукъду».

«Бара-баргъан заманлада жолчуланы этер ишлери кёп боллукъду. Миллет проектлени, эл мюлк тийрелени айнытыу программаланы чеклеринде эмда инфраструктура кредитлени хайырындан тамамланыргъа боллукъ умутларыбызны саны асламды. 2024 жылгъа дери къалайда не зат этерге сюйгенибизни билебиз, андан ары этерик ишлерибизни да ойлайбыз. Жолларыбыз жолчуларыбызны усталыкъларына, иш кёллюлюклерине кёре боллукъду», - деп чертгенди Башчы.

Поделиться: