Сыйлы ветеранны хурметин кёре

Уллу Ата журт урушну ветераны, Черек муниципал районну сыйлы инсаны Улбашланы Чокканы жашы Хусей жашагъан юйню къабыргъасына аны аты жазылгъан эсгертиу мермер къаннга орнатылгъанды. Бу ишни районну ветеранларыны совети, Сауутланнган кючлени запасдагъы офицерлерини  «Мегапир»  Миллет ассоциациясы тамамлагъандыла.

Ветеранланы советни жууаплы секретары Таукенланы Зухура мермер къанганы орнатыу бла байламлы жыйылыугъа къатышханланы ары келген къонакъла бла шагъырейлендиргенди. Ол санда РФ-ни Жигити, сыйлы аскер лётчик Владимир Алимов, сагъынылгъан Миллет ассоциацияны республикада бёлюмюню башчысы Аталаны Жашарбек, районну администрациясыны башчысыны орунбасары Улбашланы Сахадин, районда Ветеранланы советини башчысы Чеченланы Георгий, Деппуланы Хакимни атын жюрютген кадет школну таматасы Эристауланы Абдурахман бар эдиле.

Улбашланы Хусей 1923 жылда 15 июльда Къашхатауда туугъанды. Уруш башланнган кезиуде ол заводда ишлей эди. Фронтха онсегиз жылы да толмай кетгенди. Медкомиссияны ёте туруп, жашха Узакъдагъы Востокга гитче офицер къауумну хазырлагъан курслагъа жиберейикми деп соргъанларында, ол: «Мен бери окъургъа угъай, уруш этерге келгенме», - деген эди. Алай бла 23-чю стрелковый дивизияны къауумунда Сталинградны къатында Дондагъы-Къалачда уруш этгенди.

1942 жылда 21 ноябрьде къызыу сермешледен биринде Хусей, ауур жаралы болуп, госпитальгъа тюшеди. Андан а аны саулугъуну сылтауу бла экинчи жыл жаз башында юйге жибередиле. 1944 жылда халкъыбыз бла бирге ол да Орта Азиягъа тюшеди. Атасы, къарындашы эмда эгечи анда ауушхандыла. 1956 жылда ата журтуна къайтхандан сора Къашхатауда пенсиягъа чыкъгъынчы дери кёп жерледе жарыкъ бетли ишлеп тургъанды. Юйдегиси бла бирге тёрт жаш ёсдюргенди. 

Элчиле, районну тышында да анга уллу сый-намыс берип болгъандыла. Республикада жамауат жашаугъа, патриотлукъ жумушлагъа да тири къатышханды ол. Саугъаларыны санында Уллу Ата журт урушну биринчи даражалы ордени, «Жигитлик ючюн» эмда «Германияны хорлагъаны ючюн» майдаллары бардыла. Къабарты-Малкъарны Парламентини Сыйлы грамотасы, кёп ведомстволу грамотала эмда Ыразылыкъ къагъытла бла саугъаланнганды, «Черек районну Сыйлы инсаны» деген атха да тийишли болгъанды. Хурметли ветеран 2019 жылда ауушханды. Анга 96 жыл бола эди.

Жыйылгъанла Уллу Ата журт урушдан къайтмай къалгъанланы бир минут шош сюелип эсгергендиле. Ызы бла эсгертиу къанганы аллына гюлле салгъандыла. Кадетле Хусей Чоккаевични жашау жолу бла шагъырейлендиргендиле, урушну юсюнден назмула да окъугъандыла.

«Биз билебиз, сезебиз, ветеранларыбызгъа душманны къырыргъа нечик къыйын болгъанын…», - деген эди Аталаны Жашарбек. Владимир Алимов а: «Ветеранланы атлары эсибизде тургъан сагъатда бизни хорлар амал жокъду. Россей да, Къабарты-Малкъар да ёмюрлени жашап турлукъдула»,- деп къошханды.

Омарланы Мурат.
Поделиться: