Республикада миллет проектлени жашауда бардырылыуларына къаралгъанды

РФ-ни Президентини Шимал-Кавказ федерал округда толу эркинликли келечиси Юрий Чайка Къабарты-Малкъарда ишчи жолоучулукъда болгъанды. Аны чегинде  регионда миллет проектлени бардырылыу бла байламлы кенгешни къурагъанды.

Къабарты-Малкъарны Башчысы Казбек Коков жыйылыугъа видеоконференцсвязь амал бла къатышханды, аны биргесине ишлегенледен бирини коронавирус жукъгъан ауруугъа боялгъанына ишеклилиги болгъанын ангылатып. «Тёгерегимде адамланы саулукъларын сакълар ючюн ишчибизни диагнозу белгили болгъунчу самоизоляциягъа кетиуню дурус кёргенме», - дегенди ол. Регионну Башчысы республикагъа келгени эм Къабарты-Малкъарда миллет проектлени жашаугъа кийириуге эс бургъаны ючюн Юрий Чайкагъа ыразылыгъын билдиргенди.

Кенгешни чегинде Юрий Чайка быйыл КъМР-де 41 регион проект тири бардырылгъанын чертгенди, аладан 27-синде бюджет борчлау жылгъа лимитле  сегиз миллиард сомгъа дери жетдирилгендиле (аладан алты миллиарды федерал бюджетден бёлюннгенди).

Ол ырысхыны 85 процентинден асламысы «Демография», «Билим бериу», «Саулукъ сакълау», «Жашау журтла эм шахар болумла», «Къоркъуусуз эм качестволу автомобиль жолла» миллет проектлени регион бёлюмлерин бардырыугъа жиберилгенди.

Быйыл сентябрьни ортасында Къабарты-Малкъарны бюджет ырысхысыны кассалы толтурулууу 63 процент болгъанды, ол саулай къыралда кассалы толтурулуудан (55 процент) бир ненча кереге асламыракъды. Быйыл республика 125 целевой кёрюмдюге жетерге тийишлиди, аладан бюгюнлюкге 24-сю толтурулгъанды (19 процент). Ишле андан ары бардырыладыла.

Полпред жыйылгъанланы эслерин толтуруучу властьланы регион органларыны эм жер-жерли самоуправление органланы ол жаны бла ишлерин тирилтирге кереклисине бургъанды. Аны айтханына кёре, бюгюнлюкде республикада 90 объектден асламысыны къурулушлары, жангыртылыныулары эм ремонтлары бардырылады, аладан социал магъаналы къауумгъа алты сабий сад, тёрт школ, мектепледе 17 спортзал эм 10 маданият махкеме саналады.

Къабыл кёрюлген контрактла 80 процентдиле, кассалы толтурулуу а – 64 процент. Быйыл хайырланыугъа 89 объект кийирилликди, аладан 29-су хайырланыудадыла.

«Сентябрьге была осал кёрюмдюле тюйюлдюле, алай белгиленнген тириликни сакъларгъа тийишлиди, жылны ахырына дери битеу пландагъы объектлени жашаугъа кийирирча», - деп белгилегенди Юрий Чайка.

Казбек Коков республикада шёндюгю социал-экономика болумну сюзюуню чегинде озгъан айырыуланы баш эсеплерин эшитдиргенди: Къырал Думагъа Къабарты-Малкъардан «Единая Россиядан» юч депутат ётгендиле. «Анга жамауатны властьха ышаныуунача къарайбыз», - деп белгилегенди тамата.

Регионну экономикасыны юсюнден айта, Коков былай чертгенди: «Эпидемиология халгъа да къарамагъанлай, экономика болум ахшы айныугъа бурулупду. Республикалы бюджетге келген кесибизни файдалыкъларыбыз ёсгендиле, 115 процент чакълы бир, ол а Россейни Президентини миллет борчлада, миллет проектледе белгиленнген политикасыны эсебиди.  Ол властьны битеу даражаларында иш тийишлисича бардырылгъанынданды».  

Миллет проектле бла байламлы тынгылы хапарны КъМР-ни Правительствосуну Председатели Мусукланы Алий, аны биринчи орунбасарлары Муаед Кунижев эм Сергей Говоров, вице-премьер Марат Хубиев айтхандыла.

Сюзюуню эсеплерине кёре, полпред миллет проектлени целевой кёрюмдюлерине жетерча битеу кючню салып кюреширге кереклисин чертгенди.

Кенгешни ахырында Юрий Чайка РФ-ни Президентини СКФО-да толу эркинликли келечисини Ыразылыкъ къагъытларын Нальчик шахар округну жамауатха социал жумушланы тапдырыу арасыны таматасы Заур Бетугановха, Прохладна шахар округну жамауатха социал жумушланы тапдырыу комплекс арасыны таматасы Надежда Сасиковагъа, Черек муниципал районда жамауатха социал жумушла тапдыргъан комплекс араны таматасы Улбашланы Алинагъа бергенди. Полпред учрежденияланы кёп заманны пандемия болумлада уруннган келечилерини ишлерин да белгилегенди.
 
«Социал жумушла тапдыргъан араланы ишчилери, бийик адамлыкъларын кёргюзтюп, коммерциялы болмагъан организацияла эм доброволецле бла бирге болушлукъ изленнген къауумгъа – сакъатлагъа, абаданлагъа эм къыйын ауругъан адамлагъа – эс тапдыргъанлай турадыла», - деп эсеплегенди Юрий Чайка.

Къабарты-Малкъарны Башчысы Казбек Коков толу эркинликли келечиге себеплик этгени эм республикагъа социал магъаналы болгъан сорууланы тамамларгъа болушханы ючюн энчи ыразылыгъын билдиргенди. Юрий Чайка Къабарты-Малкъар Республикагъа мындан арысында да ол себеплик этилгенлей турлугъун чертгенди. 

Поделиться: