Эм кючлюлеге – саугъала, ыспас да

Нальчикни 31-чи номерли школунда КъМР-ни футболдан къыш чемпионатында хорлагъанланы къууанчлы халда саугъалагъандыла. Анга республиканы Футболдан федерациясыны президенти Аслан Машуков, «Олимпиада  комитет»  жамауат организацияны директору Александр Заруцкий, «Спартак-Нальчикни» алгъыннгы тренери Юрий Красножан, регионну спорт министрини орунбасары Заур Хежев къатышхандыла. 
Саугъалау белгили футболчу эм тренер, «Спартак-Нальчик» командабызны  юйретип тургъан Шамиль Исаевни бир минутну шош туруп эсгериуден башланнганды. 
Алай бла ветеранланы араларында эм кючлю «Спартак-Нальчик» ойнагъанды, «Вольный Ауулчула» экинчиле болгъандыла. Республиканы баш дивизионунда биринчи жерни – «Автозапчасть», экинчини – «Шагди», ючюнчюню уа «Спартак-Нальчик» команда алгъандыла. Биринчи дивизионда къараучуларын «алтын» бла «Тэрч» къууандыргъанды, аны ызындан тизмеде «Исламей» бла «Нартан» барадыла. 
Энчи саугъала бла уа айырмалы болгъан футболчула, тренерле бла къараучула белгиленнгендиле. Саугъалаудан сора эндиги кубокда къайсы командала ойнарыкълары айтылгъанды эм федерацияны толтуруучу комитетини жыйылыуу болгъанды.
Кульчаланы Зульфия.