Битеуроссей конкурсда айырмалыла

Кёп болмай  Пятигорск шахарда  «Жылны экспортёру» деген битеуроссей конкурсну округ кесегинде   хорлагъанланы  бла призёрланы къууанч халда  белгилегендиле.   Анга Россейни Промышленность, Эл мюлк министерстволарыны,  Экспорт арасыны, Шимал Кавказ федерал округну, предприятияланы келечилери къатышхандыла. Ол санда Къабарты-Малкъардан  Экономиканы айнытыу министрини орунбасары Ольга Белецкая  бла «Мой бизнес» араны таматасы Дудуланы Мадина да. 

Жыйылгъанланы алгъышлай,  видеоконференция халда  Россейни экспорт арасыны таматасы  Вероника Никишина сёлешгенди.  Ызы бла  спикерле  регион эм къырал даражада белгили брендлени, къыйматлы инструментленича, экспортну  айнытыуда   тири хайырланыуну юсюнден айтхандыла. Ахырында къууанчлы жумуш  конкурсда хорлагъанланы бла призёрланы саугъалау болгъанды. 

Быйыл конкурсда «гитче эм орта бизнес» категорияда   республикадан  юч предприятие саугъаланнгандыла. Алай бла «Промышленность бёлюмде жылны экспортёру» эм «Жылны жетишими» деген эки  номинацияда биринчи жерге  «Терекалмаз» тийишли болгъанды. Ол кёп жылланы ичинде кесин сынамлы кёргюзтген,  алмаздан тюрлю-тюрлю инструментле жарашдыргъан  кёп профильли  заводду.  Аны продукциясы,  Россейден сора да, Белоруссия, Украина, Къазахстан, Узбекистан, Иран, Бельгия, АБШ, Румыния эм башха  тыш къыраллада да  кенг белгилиди. 

 «Бийик технологияла жаны бла жылыны экспортёру» номинацияда «СмартТех» экинчи жерге чыкъгъанды.  Ол видеокамералагъа бла  видеоаналитикагъа керек программала къурайды. «Радуга»  биригиу а  «Промышленность бёлюмде жылны экспортёру» номинацияда ючюнчю болгъанды. Предприятие он жылдан аслам заманны жемишледен, тахта кёгетледен эм наныкъладан суула чыгъарады. 

Конкурсда  хорлагъанла бла призёрла эришиуню   федерал кесегине къатышырыкъдыла. Аны эсеплери декабрьде  Москвада  ётерик  «Сделано в России» деген VIII халкъла аралы экспорт форумда чыгъарыллыкъдыла. 

 

Магометланы Сулейман.
Поделиться: