Улутха берирге кюрешгенлери ючюн - жууапха

Жылны аллындан бери къырал автоинспекторланы коррупция аманлыкълагъа къатышдырыргъа кюрешген 65  кезиу эсепге алыннганды.  Алай бла водительле жолда жюрюуню жорукъларына бузукълукъла этгенлери ючюн жууапха тартылмай къалыргъа умут этгедиле. Улутханы ёлчеми 40 минг сомдан асламды.

Бу шартла бла байламлы 48 уголовный иш ачылгъанды. Алай бла машинаны жюрютюрге эринлиги болмай жолда тутулгъанла, къоркъуусуз бауну хайырланмагъанла, страховканы жарашдырмагъанда, башха бузукълукъла этгенле жууапха тартылмай къалыргъа кюрешгендиле.    

КъМР-де Ич ишле министерство улутханы берген, аны алгъан бла тенг терсленнгенин эсгертеди. РФ-ни УК-сыны 291-чи статьясыны 1-чи кесегине тийишлиликде,  къуллугъун толтургъан инсаннга  улутха берирге кюрешгеннге тазир салынады. Аны ёлчеми  500 минг сомгъа, неда инсанны жылны ичинде алгъаны хакъына жетеди. Дагъыда улутханы берирге кюрешген адам хакъсыз ишлеге тартылыргъа да боллукъду.