Больничный – жангы жорукъгъа кёре

- 7 жылгъа дери сабий ауруса, анга къараргъа больничныйге чыкъгъан анагъа ахча жангы низамгъа кёре саналлыкъды деп эшитгенме. Ангы ангылатсагъыз эди.

Фатимат. Каменка.

Соруулагъа жууапны КъМР-ни прокуроруну тамата болушлукъчусу Сотталаны Жанна береди.

- Больничныйим тёлеуню юсюнден айтханда, ол жаны бла закон кючюне быйыл 1 сентябрьде киргенди. Энди сабий ауруп, анагъа (атагъа) анга къарар ючюн больничныйге чыгъаргъа тюшсе, анга ахча алгъан хакъы тенгли бир тёленирикди, урунуу стажына да къарамай.

Бу жумушлагъа ахча Социал страхованияны фондундан тёленеди. Ата-анагъа уа документле жыйышдырыр кереклиси боллукъ тюйюлдю. Битеу тергеулени фонд больничныйни шартларына кёре кеси этерикди. 

 Ауругъан сабийине къарагъан ана ишден къаллай кезиуге эркин этилгенини   багъыуну бардыргъан врач тохташдырады. Алай больничныйни болжалы 15 кюнден  кёп болса, ол жаны бла оноуну медицина комиссия чыгъарады.

Больничный ненча кюннге берилгенин да ангылатыргъа тийишлиди. Сабийге 7 жыл толмагъан эсе, ахча толусунлай  60 кюннге тёленеди. Алай бала къыйын ауруудан  (энчи тизмеге кирген) къыйнала эсе уа, 90 кюн бериледи. 7 жылдан 15 жылгъа дери балагъа къарагъан ата-анагъа уа больничныйге ахча айлыкъ тенгли ёлчемде 15 кюннге  тёленеди. Алай жылгъа 45 кюнден кёп болмазгъа керекди.

18 жылгъа дери сабий онкологиядан къыйналса, неда вакцинадан сора саулугъу осалгъа кетсе, ата-анагъа больничный  багъыу баргъан кезиуню ичинде хакъы тенгли тёленеди.  Ол стационарда, неда амбулаторияда тургъанына да къарамай. ВИЧ-инфекциясы болгъан баланы ата-анасына да тёлеуле бу жорукъгъа кёре этиледиле.