Бюджет ахчаны къолгъа этгенди

КъМР-ни прокуратурасы район больницаладан бирини башчысына ачылгъан уголовный ишни сюдню къараууна бергенди. Ол бюджет ахчаны урлагъанына ишеклик барды.

Тиширыу РФ-ни УК-сыны 160-чы статьясыны 3-чю эмда 4-чю кесеклерине бузукълукъла этгени ючюн терсленеди. Къауум адам алгъадан келишип кеслерини къуллукъларын хайырланып, кёп санда башханы ырысхысын урлагъанына ишеклик барды.

Следствие ачыкълагъаныча, 2013-2018 жыллада терсленнген больницаладан бирине башчылыкъ этгенди. Ол районну администрациясында саулукъ сакълау системасыны къуллукъчулары бла бирге келишип, борчлу халда медицина страхованияны фондуну, республикалы бюджетни эмда медицина учреждениягъа тюшген файданы урлагъанды: битеу да бирге 38 миллион сомну.

2016 жылда февральда ол медицина учрежденияны ишин жалчытыугъа бёлюннген 21 минг сомну да къолгъа этгенди.

Прокуратура битеу къоранчны артха къайтарыуну юсюнден дау бергенди.