Гитче эм орта бизнесни айнытыугъа алланып

Кёп болмай Къабарты-Малкъар къырал университетде республиканы  Экономиканы айнытыу  министерствосу да къатышып гитче эм орта бизнесни   айнытыугъа жораланнган   конференция болгъанды. Анга КъМР-ни экономиканы айнытыу министрини орунбасары Ольга Белецкая,  республиканы  предпринимательлерине  болушлукъ тапдырыу «Мой бизнес»  араны таматасы  Дудууланы Мадина,  Россейни экспорт арасыны экспорт школуну  тренери Сергей Шестирублев, КъМР-ни гарантия фондуну менеджери  Аслангерий Бербеков, гитче бизнесни келечилери эм студентле къатышхандыла. Аны юсюнден бизге вузну пресс-службасындан билдиргендиле.

Форум  «Гитче бизнесни айнытыугъа тап онгла къурау – экономиканы айнытырча мурдор салыу» деген чакъырым  бла баргъанды. Кеси да бу  жол университетде ючюнчю кере ётеди.  Жыйылыуну ача, Ольга Белецкая быллай тюбешиуню бардырыргъа онг тапдыргъанлары ючюн КъМКъУ-ну таматаларына  ыразылыгъын билдире, вузда бу тематика бла  тюбешиуле тёреге айланнганларын да чертгенди.

- Бизнесни айнтырча жангы ызла бла  къыйматлы амалла сюзюлюрге керекдиле.  Бюгюнлюкде  кеслери алларына  бир тюрлю иш бла кюрешгенлени санына дайым къошула баргъаны къууандырады. Сёз ючюн, кёп болмай чыгъарылгъан эсеплеге кёре, аллай 12 минг инсан  профессионал иш бардыргъанлары ючюн  налогла тёлегендиле. Бир ай артхада уа  аланы саны жаланда 9 860 жетгенди. Алай бла къысха заманны ичинде  бёлюмде 4 процент ёсюм эсленеди.  Ол шарт бизнес бла кюрешгенлени   закон бла къармашыргъа сюйгенлерин эм къырал бла байламлыкъ жрютюуню къыйматлыгъын да   ачыкълайды. Бюгюнлюкде республикада алагъа иги болум къурарча иги кесек мадар этиледи,- дегенди Ольга Викторовна. 

КъМКъУ-ну кадрла эм  организация-право соруула бла бла байламлы проректорну къуллугъун толтургъан, право, экономика эм финансла жаны бла институтну  таматасы   Мурат Гукепшоков а бусагъатда коллегалары бла бирге «Бизнес информатика» билим бериу программаны жарашдыра тургъанларын, жууукъ заманда анга лицензия аллыкъларын  эсге салгъанды.   

Дудууланы Мадина  уа жыйылгъанланы «Мой бизнес» араны иши бла шагъырейлендиргенди. Ол санда   мында  предпринимательлеге болушхан ара (ЦПП), Экспортха себеплик этген  ара (ЦПЭ), Инжиниринг жаны бла регион ара (РЦИ) эм Социал бёлюмде инновацияла ара (ЦИСС) ишлегенлерин билдиргенди. 

Университетни  усталыкъ сайларгъа болушуу  управлениясыны ишини юсюнден а  аны таматасы Ратмир Коцев хапарлагъанды. Ол санда аланы  баш борчларындан бирлерине  студентлеге - урунургъа, иш бла жалчытханлагъа уа  ахшы  специалистле табаргъа себеплик этиу болгъанын да   айтханды. Эм аланы  «Факультетус» Битеуроссей порталда регистрацияны ётерге чакъыргъанды.

Конференцияны чеклеринде «Нальчикни сют комбинатыны» таматасы  Муслим Бексултанов, «Агроком» биригиуню юристи, бизнес-консультант   Ирина Темирканова, «Новая стратегия»  консалтинг компанияны таматасы,  анда ишлегенлеге  башчылыкъ этиу эксперт Елена Подберезная, гитче эм орта бизнесде автоматизация системаланы эксперти,  бизнес-тренер Наталья Игнатьева  эм «Аксиома-Лайф» биригиуню таматасы,  бизнес-консультант Владимир Васьков къатышып  бизнесни кёп тюрлю ызлары   сюзюлгенди.

Магометланы Сулейман.
Поделиться: