Республиканы оноучусу къол кётюрюуню эсеплерин белгилеу жыйылыугъа къатышханды

Къабарты-Малкъар Республиканы Башчысы Казбек Коков «Единая Россия» партияны ЦИК-ни къураучу управлениясыны видеоселектор кенгешине къатышханды. Жыйылыугъа Россей Федерацияны субъектлерини бийик къуллукъчулары, регион партияланы отделенияларыны секретарьлары, регион айырыу штабланы таматалары, партияланы регион бёлюмлерини башчылары, кандидатла эм партия актив къошулгъандыла.

РФ-ни Федерал Жыйылыууну Федерация Советини председателини биринчи орунбасары, «Единая Россия» партияны Генеральный советини секретары Андрей Турчак битеу айырыучулагъа къол кётюрюуге къатышханлары эм партиягъа билеклик этгенлери ючюн ыразылыгъын билдиргенди. Айырыучулагъа айланып дагъыда Москваны мэри Сергей Собянин, РФ-де Сабийни эркинликлери жаны бла уполномоченный Анна Кузнецова, РФ-ни Президентинде Илму эм билим бериу советни президиумуну келечиси Елена Шмелёва, регион партия эм жамауат организацияланы келечилери сёлешгендиле.

Къабарты-Малкъарда юч кюнню ичинде 13 жер-жерли эм 355 участок айырыу комиссия ачылгъанды. Сайлау жумушланы тийишли халда ётюулерине 700-ден артыкъ жамауат къараучу жууаплы болгъандыла, видеокъарау эм видеорегистратор камерала хайырланнгандыла.

Регион избиркомну билдиргенине кёре, къол кётюрюуню ахыр кюнюнде 18:00 сагъатха келиу 82,34 процент болгъанды, 444 417 инсан сайлау этгендиле. Шёндю КъМР-ни Айырыу комиссиясыны келечилери ючкюнлюк айырыу кампанияны эсеплерин чыгъарыу иш бла кюрешедиле.