«Демократиялы излемле жалчытылынадыла»

КъМР-ни Башчысы Казбек Коков бюгюн Нальчикде 1-чи номерли  школда орналгъан  123-чю номерли айырыу участкада къол кётюргенди. Эсигизге салайыкъ,  Россейни Къырал Думасына эмда республиканы жер-жерли власть органларына депутатланы айырыу быйыл  юч кюнню барады. Казбек Валерьевич а участкагъа  юй бийчеси эм къызларындан бири бла келгенди.

Бюллетеньлени толтуруп, ала сайлауларын этгендиле. Бу политика магъаналы ишни юсюнден оюмун айта, ол Къырал Думаны жангы къауумуна киргенле борчларын бийик даражада толтурлукъларына ышаннганын чертгенди.

- Республиканы инсанлары айырыу эркинликлерин толтурурча битеу мадарла къуралгъандыла. Власть органла  тийишли жумушланы тамамлагъандыла, жалынчакъсыз къараучула ишлейдиле. Ол санда Жамауат къараучуланы арасы да къуралгъанды, тюнене анда болуп, къол кётюрюу къалай баргъанын кёргенме,-дегенди ол.

Казбек Валерьевич айырыу участкаланы 80 процентинде видеокамерала орнатылгъанларын да чертгенди. «Бу сагъатда бузукълукъланы, терсликлени юслеринден бир билдириу да этилмегенди. Айырыулагъа  кёп партияла бла кандидатла къатышханларын билесиз. Къабарты-Малкъарда демократиялы   излемле жалчытылынадыла»,-деп къошханды ол.

 КъМР-ни Айырыу комиссиясыны башчысы Вячеслав Гешевни айтханына кёре уа, республикада къол кётюрюу иги  барады. Битеу 355 участкада эшиклерин эрттенликде 8 сагъатда ачхандыла. Айырыучула бютюнда Нальчикде тиридиле. «Юйюрле  бирге келген жерле да бардыла, ол а бек къууандырады»,-дегенди ол.

 Сайлауланы биринчи кюнюню тарихлерине кёре уа, тюнене, 17 сентябрьде, айырыучуланы 30 проценти  кеслерини айырыу эркинликлерин толтургъандыла.

- Участкалада  жамауат къараучула да ишлейдиле, ала мингден асламдыла, ол санда жети жюзден асламы Жамауат палатаны атындан ишлейдиле, кандидатланы ышаннгылы адамлары да бардыла.  Бу сагъатда бузукълукъланы, терсликлени юслеринден билдириуле этилмегендиле, къол кётюрюу тюзлюк бла барады,-дегенди ол эмда республиканы инсанларын барысын да участкалагъа келип, сайлауларын этерге чакъыргъанды.

Тикаланы Фатима.

Поделиться: