Участкалада къоркъуусузлукъну битеу амаллары жалчытылыннгандыла

Тюнене эрттенликде 8 сагъатда республиканы битеу шахарларында бла районларында 355 айырыу участкала ачылгъандыла. Быйыл къол кётюрюу юч кюнню бардырылады, ол адамланы къоркъуусузлукъларын жалчытыргъа, коронавирус жукъгъан аурууну жайылмазча этерге онг береди. Битеу айырыу участкалада тийишли къоркъуусуз амалла сакъланадыла: кирген заманда температураны ёнчелейдиле, къол къапла, маскала эм энчи къаламла бередиле.

Отоулада хар юч сагъатдан дезинфекция затла бла тазалау жумушла тамамланырыкъдыла, комиссияны келечилери да энчи къорууланыу затла бла жалчытылыныпдыла: маскала, къол къапла, бир кере кийилген халатла, бетни къоруулагъан экранла.

Къабарты-Малкъарда 280 айырыу участкалада къол кётюрюу ишни тийишлисича бардырылыуун 710 жамауат къараучу жалчытырыкъды, андан сора да, отоулада видео амал бла къарау камерала ишлерикдиле. Къалгъан 75 участка камерала бла жалчытылыныпдыла, ала сейф-пакетле бла бюллетеньле сакъланнган сейфлеге сутканы ичинде видеонаблюденияны бардыргъанлай турлукъдула.

Аны аллында Къабарты-Малкъар Республиканы Башчысы Казбек Коков регионда жашагъанланы айырыулагъа къатышыргъа чакъыргъанды. «Россей Федерацияны Конституциясына кийирилген эсгериулеге кёре, къыралгъа магъаналы сорууланы къабыл кёрюуде Къырал Думаны магъанасы ёсгенди. Жер-жерли самоуправленияны магъаналылыгъы да ол санда. Айырыулада сиз ышаныулугъугъузну билдирген инсанланы жууаплылыкълары да кётюрюлгенди. 17, 18, 19 сентябрьде – бу кюнлени къайсы биринде да айырыу участоклагъа келип, тийишли кёрген кандидатыгъызгъа къол кётюраллыкъсыз. Ол сизни сайлауугъуз боллукъду, къыралны, республиканы, муниципалитетни  мындан ары айныууна сизни къошулууугъуз. Хурметли жерлешлерим, къол кётюрюуге къатышырыгъыгъызны тилейме! Хар биригизни  сайлауу магъаналыды бизни келлик кюнюбюзде», - дегенди Казбек Коков кесини видеообращениясында.