Нальчикни битеуроссей курорт даражасын къайтарыргъа итинедиле

Тюнене Нальчикде «Долина Нарзанов» санаторийни 2-чи корпусуну ачылыууна аталгъан къууанчлы жыйылыу болгъанды. Анга КъМР-ни Башчысы Казбек Коков да къатышханды.

Ол, жыйылгъанланы алгъышлай, аланы арасында уа шёндю санаторийде солугъанла да бар эдиле, республикада туризмни айнытыугъа бурулгъан инвестиция проектлени магъаналылыкъларын чертгенди. «Ол файдалы болур деп бек ышанабыз. Мындан ары да инвесторла бла бирге ишлерге хазырбыз. «Россейни темир жоллары» акционер обществону «Саулукъ» компаниясы республикада быллай магъаналы жумушланы энтта бардырыр деп ышанабыз»,-дегенди ол.

Республиканы оноучусу ахыр жыллада шахарны курортуна кёп сынауладан ётерге, туристлени азайгъанына, финанс къытлыкъгъа тёзерге тюшгенин  белгилегенди. «Болсада санаторийни коллективи аладан бет жарыкълы къутулгъанды. Инфраструктура сакъланып, солугъанланы, саулукъларына бакъдыргъанланы излемлери бийик даражада толтуруладыла. Мындан ары да сиз тамамлагъан жумушланы качествосу игилене барырын тежейме», - дегенди Казбек Коков.  

Санаторийни башчысы Чапаланы Ибрагим а быллай ариу, шёндюгю излемлеге келишген мекямны ишлетир ючюн уллу къыйын салыннганын белгилеп, «Россейни темир жоллары» акционер обществону «Саулукъ» компаниясыны келечилерине, республиканы  оноучуларына, подряд организациялагъа ыразылыгъын билдиргенди. «Бу жангы корпус республиканы курорт онгларын андан ары айнытыугъа себеплик этер деп бек ышанабыз. Алай бла уа Нальчикни курорт онгларыны юсюнден, алгъынча, битеу къыралда белгили болур деп ышанабыз», - дегенди ол.

Къууанчлы ишге «Азимут хотелс» компанияны директорларыны советини башчысы Александр Клячин да къатышханды. Компания проектни инвесторларындан бири болгъанын айтырчады. Александр Ильич республиканы оноучуларына проектни жашауда бардырыугъа болушлукълары ючюн ыспас этгенди. «Бизни компания Къабарты-Малкъарны бек сюеди, башха проектлени  юслеринден сёлешиуле барадыла. Алай бла Нальчикни битеуроссей эм халкъла аралы курорт даражасы къайтарылырына ийнанабыз», - дегенди ол.

Ызы бла Казбек Коков бла Александр Клячин, къызыл бауну кесип, жангы корпусну ачхандыла. Къонакъла бу бешкъатлы мекямны болуму бла шагъырейленнгендиле. Кертисин айтханда уа, санаторий шёндюгю излемлеге кёре ишленнгенди, хар номерде да солурча онгла къуралгъандыла. Битеу да бирге анда 52 номер барды, алада 98 адамгъа жер къуралгъанды. Ол санда экиотоулу люкс номерле да.

Санаторий 1972 жылда ишленнгенин белгилерчады. 1990 жылдан бери уа аны экинчи корпусу жабылып тургъанды. Аны жангыртыуну юсюнден оноуу 2019 жылда этилгенди. Алай бла уа «Долина Нарзановда» бюгюнлюкде 247 адамгъа жер барды. Жылны аллындан бери уа анда юч мингден аслам адам солугъанды.