Россельхозбанк студентлени стипендияларына къошханды

Россельхозбанк В.М. Коков атлы Къабарты-Малкъар къырал аграр университетни студентлерине быйыл стипендияларын кётюргенди, деп билдиреди финанс учрежденияны пресс-службасы.

Банк 2021-2022 окъуу жыллада стипендия бергенлени санын  54 адамгъа дери кёбейтгенди, ай сайын тёлеген стипендияны уа 12, 5 мингден 15 миннге дери.

Быйылгъы окъуу жылда  Россей Федерацияны Эл мюлк министерствосуна бойсуннган аграр вузланы 450 студенти банкдан финанс болушлукъ аллыкъдыла.  

Финанс биригиуню стипендияла  программасыны баш борчу – аграр университетледе окъугъан фахмулу студентлеге болушлукъ этиудю. Андан сора агропромышленный комплексге жараулу специалистлени хазырлаугъа себеплик бериу эм жаш тёлюге окъугъан кезиулеринде тап онгла къурауду.

Башда сагъынылгъан стипендия он эки айны ичинде иги белгиле алып тургъанлагъа, илму иш бла кюрешгенлеге эм олимпиадалагъа къатышханлагъа бериледи.

«Россельхозбанкны стипендия программасы университетде окъугъанланы арасында уллу сейир къозгъагъанды. Стипендия студентлеге окъууда ахшы кёрюмдюле болдурургъа себеплик этгенинден сора да, республиканы эм къыралны эл мюлкюнде урунурукъ специалистлеге профессионал бийикликлеге жетерге да болушурукъду. Бек ышанама, жууукъ заманда стипендия алгъанланы ичинде эл мюлкню тюрлю-тюрлю бёлюмлеринде тынгылы специалистле, аналитикле эм предпринимательле боллукъларына.

Россельхозбанкны оноучуларына бу программа ючюн уллу ыразылыгъымы билдирирге сюеме», -дегенди эки кере да стипендиягъа тийишли болгъан, «Экономика эм управление» факультетни магистранты Милена Болова.

 Бизни корр.

Поделиться: