Уулу кырдык сыйырылгъанды

«Шах-шах-2021» ведомствола аралы операцияны эсеплери чыгъарылгъандыла. Ол республикада майдан октябрьге дери кезиуде бардырылгъанды. Кеси да наркотиклени хайырланыу жаны бла аманлыкъланы тохтатыр, уулу кырдык ёсген жерлени ачыкълап, аланы жокъ этер мурат  бла къуралгъанды. Андан сора да, наркотиклери болгъан кырдыкланы ёсдюрюу, аны сатыу бла кюрешгенлени ачыкълау жаны бла тийишли жумушла да толтурулгъандыла.  

Операция бардырылгъан кезиуде полициячыла наркотиклени (уулу кырдыкдан этилген) законсуз сатыу-алыу бла байламлы 40 уголовный иш ачхандыла, ол санда уулу кырдыкланы ёсдюргенлеге 3 материал жарашдырылгъанды. Законсуз сатыу-алыудан 6,2 килограмм наркотик сыйырылгъанды. Уголовный жууапха 38 адам тартылгъанды, энтта 69 инсаннга административ материалла жарашдырылгъандыла. Бу кезиуде 115 гектар жерде законсуз ёсдюрюлген уулу кырдык жокъ этилгенди.

Республиканы табийгъат, хауа болумуну хайырындан кендир, шах-шах кеси аллына ёсерге да боллукъдула. Алай, РФ-ни правительствосуну бегимине тийишлиликде, жерни иеси уулу кырдыкны жокъ этерге борчлуду.  

Жерни иеси, неда аны хайырланнган инсан жууаплы органдан уулу кырдыкны кетерирге кереклисини юсюнден эсгертиуню алгъандан сора аны толтурмаса, РФ-ни административ кодексине тийишлиликде жууапха тартыллыгъын айтырчады. Быйылдан а тазир кёбейтилгенди. Алай бла инсан 4-5 минг сом тёлерикди, жууаплы къуллукъчугъа уа 5-10 минг сомну берирге тюшерикди. Организациягъа тазирни ёлчеми 5-100 минг сомгъа жетеди. Тазир тёленнгенден, сора да уулу кырдыкны жерни иесине кетерирге тюшерикди.  

КъМР-де МВД-ны наркотиклеге къажау управлениясы республиканы халкъын сакъ болургъа, уулу кырдык ёсдюрюлген жерлени юслеринден право низамны сакълаучу органлагъа, шахарланы бла эллени администрацияларына билдирирге тилейдиле.