Сёз экономикада кёрюмдюлени юсюнден баргъанды

КъМР-ни Башчысы Казбек Коков республиканы  Правительствосу бла жыйылыу бардыргъанды.

Жыйылыугъа КъМР-ни Правительствосуну Председатели Мусукланы Алий, аны биринчи орунбасарлары Муаед Кунижев бла Сергей Говоров, КъМР-ни энергетика эм сатыу алыу министри Шамиль Ахубеков, КъМР-ни къурулуш эм жашау-коммунал мюлк министри Алим Бербеков, КьМР-ни транспорт эм жол мюлк министри Аслан Дышеков, КъМР-ни экономиканы айнытыу министри Борис Рахаев, КъМР-ни жер эм ырысхы байламлыкъланы жюрютюу  жаны бла министри Шаваланы Ильяс, КъМР-ни курортла эм туризм жаны бла министри Мурат Шогенцуков къатышхандыла.

Къабарты-Малкъарны Башчысы жыйылыугъа чакъырылгъанланы алларында 2021 жылда республиканы социал-экономика айнытыуну прогноз кёрюмдюлерине жетерге кереклисини юсюнден борчланы салгъанды.

Башда сагъынылгъан сорууланы юсюнден аналитика билдириулени Муаед Кунижев бла Сергей Говоров этгендиле. Алагъа кёре, сатыу-алыуда, эл мюлкде, жашау журтла ишлеуде, инфраструктура бла байламлы къурулушда, автомобиль транспортда жюкле ташыуда ёсюм барды.

Мусукланы Алий айтханнга кёре, промышленность производствону бир -бир бёлюмлеринде кёрюмдюле бир кесек аз болгъанлыкъгъа, толусунлай алып айтханда, саллыннган борчла толлукъдула. Республиканы Башчысы бюгюнлюкде экономикада болгъан  болумну тынгылы тинтип, анга кёре ишни тирилтирге эм керекли мадарланы да этерге буюргъанды.

Бизни корр.