Аллахуталагъа башханы тенг этгенден уллу гюнах жокъду

Эслегенмисиз, арт кезиуде миллетибизде сабийлени, ол угъай, таматаланы да бууунларында бир къызыл баучукъ тагъылыпды. Аланы артистле, жырчыла, футболчула да жюрютюп, халкъда, жамауатда, бютюнда уа ёсюп келген тёлюде кенг жайгъандыла. Алай къызыл бауну буууннга къысардан алгъа уа бу тёре къайдан келгенди, ол къаллай магъананы тутады, муслийманлагъа ол жараймыды, деп сагъыш этген болурламы адамларыбыз?

Къызыл бауну сол къолда жюрютюу тёре каббаладан келгенди, деп жазадыла тарыхчыла. Бу сектаны келечилери не бла кюрешгенлери уа белгилиди. Иудей таурухха кёре, аны биринчи Иаковну юй бийчеси Рахилни къолуна къысхандыла. Андан сора уа ол эки сабий тапханды. Ма бу таурухха баш ура, каббаланы келечилери хар жылдан Вифлеемде Рахилни къабырыны тёгерегине къызыл бау тартадыла, ызы бла уа аны кесип, динни келечилерине юлешедиле.

Дагъыда сабийлени бууунларына, бешикни башына бирле кёз суратлары бла минчакъла тагъадыла. Ол аман кёзден сакълайды деп ийнанадыла алай этгенле. Алай ол жахиллик тюйюлмюдю? Минчакъ адамны къалай сакъларыкъды? Бу тёре Востокну къыралларындан келгени ючюн бирле аны исламгъа келишген сунадыла. Алай ала къалай уллу жангыладыла. Дууала, амулетле жюрютюу исламда бек уллу гюнахлагъа саналады.

Хасания элни иймамы Мисирланы Тимур хажи бизге ангылатханыча, бау, амулет, дууа, минчакъ, алача башха затланы жюрютюп, ала аман кёзден, къыйынлыкъладан сакълайдыла деп ийнаннган ширкди. Динде уа Аллахуталагъа нёгер излегенден, башханы анга тенг этгенден уллу гюнях жокъду. «Дууа, къызыл бау аманлыкъладан сакъларыгъына ийнаннганла Аллахуталадан  болушлукъ излемейдиле, анга ийнанмайдыла», - дейди Тимур хажи.

Ислам динде дууа жюрютюрге эркин этилмегенлерини юсюнден Къуранда, хадиследе да кёп айтылады. Ма бир юлгю. Бир жол Мухаммад файгъамбаргъа, Аллахны саламы анга болсун, къауум адам келгендиле. Ол аладан тогъузусу келтирген антны къабыл кёргенди, бирин а - угъай. Алай нек этгенсе, аны нек къойгъанса, деп соргъанларында, Мухаммад (АСБ): «Аны юсюнден дууа барды», - дегенди. Ызы бла ол адамны боюнундан аны тартып алгъанды, ол берген антны да жаланда андан сора къабыл кёргенди. «Дууа такъгъан Аллахха нёгерле излейди (ширк)», - дегенди файгъамбар». (Ахмад 4/156, аль-Хаким 4/417).  

Башха хадисде уа былай айтылады, аны ‘Имран ибн Хусайн билдиргенди: «Бир жол Мухаммад файгъамбар, Аллахны саламы анга болсун, бир адамны къолунда сары жюзюк кёрюп, ол неди, деп соргъанды. Ол а: «Мен аны къарыусуз болмаз ючюн жюрютеме», - дегенди. Жууапны эшитгенде, файгъамбар (АСБ): «Терк окъуна теш аны, ол сени андан да къарыусуз этеди. Къолунгда бу жюзюк бла ауушсанг, насыпха бир заманда да жетишалмазса», - дегенди. (Ахмад 4/445, Ибн Маджах 3531. Бу хадисни тюзлюгюн иймам Ибн Хиббан, аль-Хаким, аз-Захаби хафиз аль-Бусайри и шейх ‘Абдуль-Къадир аль-Арнаут къабыл кёргендиле).

Билимсизликлерини, жахилликлерини хатасындан дууа болушады, сакълайды, жаланда хайыр келтиреди деп ийнаннганлагъа уа энтта башха юлгю келтирирге боллукъду. Ол файгъамбарны сахабасы Абдуллаха ибн Мас'уд эм аны юй бийчеси бла байламлыды.  

Абдуллаха ибн Мас'уд юй бийчеси Зейнабни боюнунда бау къысылып тургъанын кёргенди. «Бу неди?» - деп соргъанда, тиширыу: «Бу баугъа мени ючюн тилек окъулгъанды», - деп жууаплагъанды. Аны эшитгенде, файгъамбарны сахабасы бауну жыртып атханды. «Кертиди, ‘Абдуллахны юйюнде ширк керекмейди. Бир жол Мухаммад файгъамбар, Аллахны саламы анга болсун, былай айтханын эшитгенме: «Рукья (хыйны этиу), амулетле, дууала эркин этилмейдиле, ала ширкдиле». Зейнаб аны бла тынчаймай: «Алай нек айтаса, кёзюм ауругъанда, мен бир чюйютлюге барып, хыйны этдиргенден сора, ол сау болгъан эди», - дейди. Файгъамбарны сахабасы: «Кертиди, ол шайтанны иши болгъанды. Ол кёзюнге бармагъын сукъгъанды…»

- Бу юлгюле муслийман къарындашларыбызны бла эгечлерибизни дууаларын, къолларындан къызыл бауланы, машиналарында жюрютген амулетлени тешерге кереклисине тюшюндюрген болурла деп ийнанама. Аллахны ачыуландырмагъыз, чамландырмагъыз. Аллай затланы жюрютюп, сиз жаланда шайтанны къууандырасыз, аны бла бирге уа исламда бек уллу гюнахны этесиз – бизни Жаратханнга нёгер излейсиз, - деп тыяды бизни гюнахдан Тимур хажи.