Хар суратда – энчи ыз

Республиканы Къыраллыгъыны кюнюне жораланып, Нальчикни солуу паркында художниклени бла сурат алыучуланы чыгъармаларыны "Кесини ызы" деген тёрели кёрмючлери ачылгъанды. Аны КъМР-ни  Культура министерствосу, республиканы Миллет музейи, Къабарты-Малкъарда суратлау искусстволаны А.Л. Ткаченко атлы музейи да къурагъандыла.

Анга къараргъа кёп адам келгенди, аланы араларында абаданла, гитчеле да бар эдиле. «Бу суратланы кёргенни кёзю жарымай, жюреги къууанмай къаллыкъ тюйюлдю. Бюгюн бери келгениме бир да сокъуранмайма, бир-эки суратны сатып окъуна аллыкъ эдим, сатмайла ансы», - дегенди "Маяк" санаторийде солуп тургъан москвачы Владимир Борисов.

Кёрмючде КъМР-ни Художниклерини союзуна киргенлени, профессионал суратчыланы да ишлери бла бирге, искусствону бу тюрлюсюнде биринчи, алай таукел атламла этгенлени да чыгъармаларын кёрюрге боллукъ эди. Аланы асламысы арт жыллада алыннганладыла эмда жазылгъанладыла. Суратланы араларында республикада белгили артистлени портретлери, тауланы, тюзлени, череклени, агъачланы  жылны тюрлю-тюрлю кезиулеринде ариулукъларын кёргюзтген ишле да бар эдиле. Сёз ючюн, Александр Падва артистлени сыфатларын уста ишлеу бла атын айтдыргъан эсе, къарындашла Михаил бла Дмитрий Пузенкола лирикалы тарихлени, эрттенлик туманны, таулада кюз артын, Ирина Шинунова уа Лепешинскийни юйюн, дагъыда башхаланы аламат суратлагъандыла.

Далхатланы Марзият.
Поделиться: