Сабийлеге къоркъуу чыкъмазча

Билимни кюнюнде Нальчикни окъуучулары «Водительле! Сакъ болугъуз! Сабийле мектепге барадыла!» деген чакъырыуу бла флешмоб бардыргъандыла. Бу ишге Нальчикни ГИБДД-сыны таматасы полицияны майору Вячеслаев Агеев да къошулгъанды.

Акцияны мураты жолда къоркъуусузлукъну жалчытыуду. Окъуу жыл башланнганлай улоугъа сабийлени жюрютген транспортла чыгъарыкъдыла, гитчеле кеслери да жаяу жюрюрюкдюле. ГИБДД-ны келечилери эсгертгенлерича, биринчи класслагъа баргъан жашчыкъла бла къызчыкъла машинала жюрюген жолланы кеслери алларына ётерге керек боллукъдула, аны ючюн абаданла гитчелеге къоркъуусуз болумланы жалчытыргъа керекдиле.

Сабийле да биринчи окъуу кюнлеринден башлап жолда жюрюуню жорукъларын билирча эм эсде тутарча Нальчикни баш автоинспектору Вячеслав Агеев алагъа «юй-мектеп-юй» къоркъуусуз маршрутну юсюнден айтханды.