Жюзюп, Босфорну бир жанындан башхасына ётгенди

Хасаниячы жашла кёп жерледе спорт бла атларын айтдырып келедиле. Ала келтирген хорламла бла жаланда ала кеслери, ахлу-жууукъ, аланы юйретген тренерле угъай, саулай малкъар халкъыбыз да ёхтемленеди. Ол жетишимле бу махтаулу спорт школну, элни, миллетибизни да тарыхына жазылып барадыла.

Боташланы Азнауурну уланы Ибрагим, спортну кёп тюрлюсю бла шагъырейди. Бу кюнледе уа ол бизни жюзюп, бир бири ызындан алчы жерлеге чыкъгъаны бла къууандыргъанды. Бютюнда ол профессионал спорт бла кюрешмегенин эсге алсакъ, аны хорламы артыкъда багъалыды.

Ол Нальчикде туугъанды, ёсгенди, Хасанияны 16-чы номерли школунда окъугъанды. Аны айырмалы (алтын майдал) бла бошагъанды. Ал атламлары алай жетишимли болгъан жаш ата-анагъа, жууукъ-ахлугъа да ахшы умутла этдиргени туурады. Ол 2011 жылда Санкт-Петербургга кетип, анда Россейни миллет излем бла байламлы бийик окъуу юйлеринден бирине – Информация технологияла, механика эм оптика университетни (СПбГУИТМО) информация-технологияла эм программирование бёлюмюне киргенди. Таулу жаш 2015 жылда аны бакалавриатын тауусханды, 2017 жылда уа анда магистр диссертациясын да къоруулагъанды. Алай бла Ибрагим бюгюннге жарагъан усталыкъ алгъанды. Дипломунда «Разработка корпоративных информационных систем» деп жазылады.

Урунуу жолун ол Санкт-Петербургда Digital Design (Цифровой дизайн) компанияда башлагъанды. Аны анда электрон документлени айланыуларыны системасын къурагъан, жангыртхан, айнытхан бёлюмге алгъандыла. Бюгюн ол аны таматасыды. Ол ишчи къауум Россейни толтуруучу властыны органларыны асламысында докуменле бла ишлеуню автомат халда бардырыуну жалчытадыла. Сёз ючюн, компьютерлени, Интернетни юсю бла  ишлеген, башха МФЦ, Госуслуги дегенча программаланы жашауда бардырады. Аны бла халкъыбызгъа таплыкъгъа деп жарашдырылгъан электрон службаланы айыпсыз, тохтаусуз ишлеулерине себеплик этеди.

Ибрагим жаш адамды, алай а тестирование программаланы жалчытыуну юсю бла бу компанияда къуралгъан инженерле хазырлагъан школну устазыды, анда профессионал команданы да сертификациялы таматасыды.

Ол бусагъатда, алда айтханыбызча, спортну сууда жюзюу тюрлюсю бла кюрешеди. Бюгюннгю жетишимлери да аны бла байламлыдыла. Боташ улу 2019 жылда Санкт-Петербургда Петропавловская крепость сюелген тарыхлы жерде Неваны бир жагъасындан башхасына дери (эки километр бла ючжюз метр) ким алгъа жюзсе да деп къуралгъан эришиуледе хорлагъанды.

Бу ишни къурагъанла, жаш адамны жетишимлерине эс буруп, аны Нижний Новгородда баргъан аллай эришиулеге чакъыргъандыла. Анда, Волганы бир жанындан бирси жанына ётюп, юч километр жюзюп, хорлагъанды Ибрагим.

Быйыл августда спортну ол тюрлюсю бла кюрешгенле Ибрагимни Стамбулда Босфор богъазда баргъан континентал эришиулеге чакъыргъандыла. Боташ улу анда проливни бир жанындан бирси жанына жюзюп (алты километр бла жарым), «Континентальный пловец» деген даражалы атха тийишли болгъанды.

Бу жетишимлерини юсюнден ушакъ эте келгенде, Ибрагим спортну бу тюрлюсюн  нек сайлагъаныны юсюнден былай айтады: «Юч жыл мындан алгъа мен быллай узакълыкъгъа жюзе билмей эдим. Сынауум – бассейнде жыйырма беш метр. Иги жюзерге юйренирге керекме деген оюм а Португалияда болгъанымдан сора эсиме терк-терк келе башлагъанды. Анда серфинг бла баргъанымлай, бир уллу толкъунну тюбюне тюшеме да, тёгерек айландырады ол мени. Аллай спорт бла кюрешгенледе ол болумгъа «Washinq Machine» - «Быстыр жуугъан машина» дейдиле. Кеси- кесиме келип, чыгъа башлайма да, жангы толкъун жабады. Амал этип, Аллах болушуп, андан чыгъама да, ол толкъунла бир жанына сызгъан къангам таба жюземе. «Иги жюзерге юйренирге керекме», – деген оюм акъылымда, ол къанганы да тутуп, жагъагъа жюзюп бара туруп туугъанды…»

Айхай да, не ишде да, бийик жетишимле болдурур ючюн, адам кёп кюреширге керекди. Анга умутха жетиуде артха турмау, къатылыкъ, низам да къошулсала уа, хорлам кесин сакълатмайды.

Ибрагим халкъын сюйген адамды. Ол «Эльбрусоид на Неве» деген жамауат биригиуню ишине тири къатышады. Анда къарачай-малкъар халкъны маданиятын, адет-тёрелерин жайыуда этген къошумчулугъу ючюн «Жамауат иш» номинацияда «Признание» деген саугъагъа тийишли болгъанды.

Ма аллай махтаулу жаш ёсдюргендиле къурулушчу инженер Боташланы Ибрагимни жашы Азнауур бла аны жашау нёгери, Хасанияны школуну математикадан устазы Хутуйланы Юсюпню къызы Жансурат.   

Ибрагим ишинде, спортда да жетишимлери бла бизни энтта да кёп кере къууандырлыгъы баямды. Сау айлансын!