Кеслерин тап жюрютюрге кёллендирген атлам

Бу кюнледе РФ-ни УФСИН-ини Къабарты-Малкъарда 4-чю номерли тюзетиучю колониясында ачыкъ эшиклени кюню бардырылгъанды. Ары тутмакъда тургъан онеки тиширыуну жууугъу, ахлусу келгендиле, аланы араларында аналары, баш иелери, сабийлери да бар эдиле.

Тюбешиу учреждениягъа законнга келишмеген затланы кийирирге эмда тутмакълагъа берирге жарамагъаныны юсюнден шагъырейлендириу ушакъ бла башланнганды.

Колонияда ишлегенле анда тургъанла къаллай болумлада болгъанларын, не ишлегенлерин да айтхандыла, арада тиширыула тикген затланы кёргюзтгендиле.

Ахырында уа къонакъланы чай ичерге чакъыргъандыла. Ашханада тутмакъла жууукълары бла эркин олтуруп, хапар айтыргъа онг болгъанды. Ала кетип башлагъанларында уа тиширыула кеси къоллары бла этген саугъаланы  бергендиле.

Ачыкъ эшиклени кюню ишлери сюдлюк болгъанланы кеслерин тап жюрютюрге, ишлерге кёллендирген атламды. Ала кеслерини хайырларын да кёргюзтедиле. Эки жаны да бир бири бла тюбешип,  халларын, жашау, турмуш  болумларын да биледиле, андан сора да къонакъла учрежденияны администрациясында ишлегенлеге аланы  къайгъы, сейир этдирген сорууланы да берирге онг табадыла.