Иш табалмагъанлагъа тёлеуле – болжалдан алгъа

Бир тюрлю сылтау бла, сёз ючюн, предприятие жабылып неда штатны азайтыу бла байламлы ишсиз къалгъан предпенсиячылагъа, ала жангы иш табалмай эселе, пенсиягъа эки жылгъа алгъа чыгъаргъа онг бериледи. Аны юсюнден оноуну Пенсия фонд халкъны иш бла жалчытыу службаны билдириуюне кёре этеди. Сора, пенсиягъа бу чурум бла чыгъар ючюн, эр кишилени урунуу стажлары – 25, тиширыуланы уа – 20 жыл болургъа, пенсия коэффициентлери да 2021 жылда 21-ге жетерге керекдиле.    

Болжалгъа дери пенсия инсан аны юсюнден заявление жазгъан кюнден башлап  тохташдырылады, ол къабыл кёрюсе. Пенсия алыргъа жыл саны жетгенлей, ол жангыдан фондха анга страховой пенсия тёленирча заявление иерге керекди. Тёлеусюз къалмаз ючюн, бу жумушну бираз алгъаракъ тамамларгъа тийишлиди. Быллай пенсияны алгъан адам ишге кирген эсе, жашаргъа башха жерге (Россейни ичинде неда тыш къыралгъа) кёчген эсе, юйюрюнде болгъан адамланы саны тюрленнген эсе, фондха билдире турургъа керекди.