КъМР-ни Башчысы «муниципал сагъатны» бардыргъанды

КъМР-ни Бшчысы Казбек Коков «муниципал сагъатны» бардыргъанды, аны ишине КъМР-ни Правительствосуну Председатели Мусукланы Алий, аны биринчи орунбасары Муаед Кунижев, КъМР-ни саулукъ сакълау министри Рустам Калибатов, КъМР-ни жарыкъландырыу, илму эм жаш тёлюню ишлери жаны бла министри Анзор Езаов, муниципал къуралыуланы администрацияланы башчылары къатышхандыла.

Рустам Калибатов билдиргеннге кёре, бюгюнлюкде республикада эпидемиология болум бир кесек тюзеле башлагъаннга ушайды, госпитальлагъа тюшгенлени саны да аз бола барады.

Битеу да больницалада 745 ундурукъ жарашдырылгъанды, алада  614 адам  жатадыла, реанимациялада 76 саусуз турады, амбулатория амал бла 969 адам  багъылады. Вакцинацияны 160 мингнге жууукъ адам этгенди, аладан 125 минги эки кезиуню да ётгендиле.   Бирикген иммунитет болур ючюн план 40,3 процентге толгъанды.  Халкъгъа иммунизация  этиу жаны бла Зольск, Эльбрус районла эм Прохладный шахар алчыланы санындадыла.  

Республиканы Башчысы муниципал къуралыуланы  таматаларына вакцинацияны бардырыу бла байламлы халкъ асламланы ичинде ангылатыу ишни бардырыргъа кереклисин эслерине салгъанды.  Биринчи сентябрден башлап, школлада окъутуу тёрели халда барлыгъын билдиргенди, аны бла бирге Баш санитар врачны санитар-эпидемиология  жорукъланы мындан арысында да жюрютюрге кереклисин чертгенди.  

 Ол дагъыда Пролетарское элде школну ремонту бошалгъанын айтханды, аны бла байламлы  эллиле Башчыгъа тюзюнлей линияны бардыргъанда тилеклерин билдирген эдиле.   Красносельское элде 500 сабийге деп жангы школну проекти эм къагъытлары да жарашдырылгъандыла.  КъМР-ни Жарыкъландырыу, илму эм жаш тёлюню ишлери жаны бла министерствосу  къошакъ халда окъуу жерле къураргъа федерал бюджетден Россей Федерацияны «Билим бериуню айнытыу» деген къырал программасындан субсидия алыр ючюн  заявка жибергенди. Казбек Коков  жер-жерли администрацияланы таматаларына сабийле тургъан социал учрежденияланы тапландырыу бла байламлы кемчиликле  къалгъан эселе, аланы  болжалгъа салмай, тамамларгъа кереклисин эсгертгенди.  

Мусукланы Алий муниципал къуралыулада миллет проектле къалай толтурулгъанларыны юсюнден айтханды. Сегиз миллет проектни тамамларгъа бёлюннген 1,6 миллиард сомдан, бюгюнлюкге 968 миллион сом хайырланнганды, башхача айтханда, ол 58 процент болады.

 «Чыгъармачылыкъ иш бла кюрешген адамла» деген проектде  мероприятияла бошалгъандыла,  «Адамлагъа жашаргъа тап онгла къурау» проектде 32 муниципал объектде ишле этилгендиле, къалгъан сегиз объектде алыкъа бардырыла турадыла. «Хар сабийни жетишими» деген проектде школланы спорт залларына тынгылы ремонт этилгенди.

«Муниципал сагъатны» кезиуюнде районланы жер-жерлеринде тизгинни жыйыу соруула да сюзюлгендиле. КъМР-ни Башчысы Казбек Коков республиканы Правительствосуна муниципал администрацияла «Экологистика» деген регион оператор бла ишлерин болгъан онглагъа кёре къураргъа эм жумушланы да тынгылы этерге буюргъанды.

 Бизни корр.