Ёзек тема – онкология саусузлагъа энчи эс буруу, не жаны бла да болушлукъ тапдырыу

Къабарты-Малкъар Республиканы Башчысы Казбек Коков озгъан шабат кюн Саусузлагъа болушлукъ тапдыргъан Битеуроссей жамауат организацияны Онкология саусузланы «Здравствуй!» ассоциациясыны президенти Ирина Боровова, ол дагъыда РФ-ни Президентинде Граждан обществону эм адамны эркинликлери жаны бла советни келечисиди, эм Онкология саусузланы «Здравствуй!» ассоциациясыны СКФО-да бёлюмюмню таматасы, онкоблогер Оксана Келехсаева «Светлячок» бла тюбешгенди. Тюбешиуге КъМР-ни саулукъ сакълау министри Рустам Калибатов, аны саусузланы дарманла бла жалчытыугъа къарагъан орунбасары Заурбек Батыров да къатышхандыла.

Жолугъууну чегинде Ассоциация  КъМР-ни Саулукъ сакълау министерствосу, жамауат организацияла бла планларын эм кёп заманны ичинде бардырылып турлукъ байламлыкъларын сюзгендиле. Аны аллында КъМР-ни Саулукъ сакълау министерствосу эм Ассоциация байламлыкъ жюрютюу келишимге къол салгъандыла.  

Делегация Онкология диспансерде да болгъанды, анда онкология саусузла, врач-специалистле эм республиканы жамауат организациялары да къошулуп Ассоциацияны презентациясы къуралгъанды. Къонакъла жамауат организацияны жетишимлерини, онкология саусузлагъа болушлукъ тапдырыуну качествосу бла байламлы чыкъгъан жарсыуланы федерал властьланы даражаларында тамамлагъан ишлерини юсюнден айтхандыла, Нальчик шахар окруну Тиширыуларыны советини, КъМР-ни Минздравында Жамауат советни келечилерини эм медицина махкемени саусузларыны сорууларына жууаплагъандыла.

Казбек Коков къонакълагъа келгенлери эм республиканы саусузларына эс бургъанлары ючюн ыразылыгъын билдиргенди. «Сиз керти да огъурлу иш бла кюрешесиз, онкология саусузлагъа болушлукъ бересиз. Ол сый-намысха тийишлиди,- дегенди. – Сизни оюмугъуз, болумубузну кёргенигиз бизге бек магъаналыды. Биз байламлыкъ жюрютюрге хазырбыз».

Ирина Боровова, кесини жанындан, онкология саусузла энчи эс бурууну, къарауну излегенлерин, алагъа заманында болушлукъ жашау магъаналы болгъанын чертгенди. Ол республиканы оноучуларыны эм саулукъ сакълау системасы пациент сообщество бла ушакъгъа хазырлылыкъларына, чыкъгъан сорууланы саусузланы сейирлерине кёре тамамларгъа итиннгенлерине ыразылыгъын билдиргенди.

- Дуния башында бир къырал да саусузлагъа деп жарашдырылгъан жангычылыкъланы ахча жаны бла толусунлай жалчыталлыкъ тюйюлдю. Алай алтын халлы орталыкъны табаргъа боллукъду, анга кёре адамны жашауун сакълап, аны качествосун игилендирип, ол жамауатны эм саулукъ сакълауну тохтамай тамамланып турлукъ жумушларыды, - дегенди Ассоциацияны президенти. «Сизни онкослужбагъызны шёндю бек кючлю таматасы барды, ол федерал учреждениядан болгъаны себепли онкология саусузланы багъыу битеудуния стандартланы биледи», - деп да къошханды ол.

Тюбешиуде алгъадан эртте салыннган диагностиканы, багъыуну, реабилитацияны, онкология патологияланы профилактикасыны жангы ызлары сюзюлгендиле, паллиатив болушлукъну, ол санда амбулатор багъыуда болгъан сасузлагъа патронаж этиуню эм социал себепликни юсюнден айтхандыла.  «Аллай халлы болушлукъ алыкъа энди айный барады, кенг жайылмагъанды, алай федерал даражада Ассоциация законла чыгъарыу актлада тюрлениуле кийириуге къошулады, башламчылыкъларын эм предложенияларын чыгъарады», - деп белгилегендиле къонакъла. Онкология саусузланы реабилитацияларын айнытыргъа Нальчикни санатор-курорт онгларын хайырланыу амалланы да сюзгендиле.

Жамауат организацияланы келечилери бла ушакъда жангы онкология диспансерни къурулушуну ахырына жетдириу тема кётюрюлгенди. Казбек Коков бу жаны бла иш бардырылгъанын ангылатханды, къурулушну жангыдан башларгъа мурат этиледи, федерал даражада объектни целевой программагъа къошар онгла изленедиле.

Пациент сообщество бла тюз ишни къурауну магъаналылыгъы ушакъны баш темаларындан бири болгъанды. Оксана Келехсаева биринчи кере ол жаны бла диагноз чыгъарылгъан саусузну жангы болумлагъа келишиуюне, врачланы бла саусузланы араларында ушакъланы тап къуралыуларына, закон жаны бла оноула излеген соруула бла регион эм федерал даражагъа чыгъаргъа пациент сообщество болушханын айтханды.

Онкопациентлени ассоциациясы 2016 жылда къуралгъанды. Организация  врачла бла саусузланы араларында байламлыкъланы къуралыуларына къошулуп болушлукъ этеди. Ассоциацияны келечилери Россей Федерацияны 58 регионунда ишлейдиле.

«Сизде пациент сообщество къураргъа бек сюебиз, блогерча республикадан кёп саусузла бла байламлыкъла жюрютеме. Аллай байламлыкъла врачла бла бирге болургъа болушадыла, пациент врач бла бир тилли болса уа, багъыу да бютюн магъаналыды», - дегенди ол.

Казбек Коков Ассоциацияны келечилери бла онкология службагъа кадрланы келтириу жаны бла регион программаны къурау онгланы сюзгенди. Андан сора да, «Здравствуй!» онкология саусузланы ассоциациясы  онкологиялары болгъан саусузла бла коронавирус жукъгъан ауруугъа вакцина салдырыргъа тийишлисини юсюнден ангылатыу ишни бардыргъанлай турады эм ол ишни Къабарты-Малкъарда ётдюрюрге муратлыды.

Республиканы Башчысы бла тюбешиуде Къабарты-Малкъарда  Шимал-Кавказ онкология форумну бардырыуну юсюнден бир оюмгъа келишгендиле. Проектге мастер-классла, ачыкъ кюнлени эшиклери, Н.Н. Блохин атлы онкология НМИЦ-ни, П.А Герцен атлы МНИОИ-ни, Акушерствону, гинекологияны эм перинатологияны академик В.И. Кулаков атлы НМИЦ-ини алчы специалистлери къатышхан жыйылыула къошуллукъдула. Казбек Коков форумну бардырыугъа не жаны бла да себеплик этерге хазыр болгъанын айтханды, андан сора да, Ассоциациягъа федерал даражада Россей Федерацияны Къырал советини президиумуну келечисича болушургъа да.