Диабет ассоциацияны келечилери – Минги тауну тёппесинде

Россейни диабетден ауругъанланы ассоциациясыны келечилери Минги таугъа ёрлегендиле. Аланы араларында Москвадан, талай региондан  диабетни биринчи тюрлюсюнден ауругъанла, Эндокринологиядан илму медицина излем араны специалистлери, врачла-эндокринологла болгъандыла. Ёрлеуню ала инсулин ачылгъанлы 100 жыл толгъанына жоралагъандыла, нек дегенде аны хайырындан саусузланы жашауларын тюрлендирген  магъаналы тинтиуле этилгендиле.

Къонакъла бла республиканы саулукъ сакълау министри Рустам Калибатов, баш эндокринолог Инна Шихалиева, медицина организацияланы келечилери тюбешгендиле. Ала эндокринология жаны бла кёп башха регионлагъа да магъаналы проблемаланы сюзгендиле. Араны специалистлери жер-жерли эндокринологлагъа бла терапевтлеге вебинарла бардыргъандыла, алада инсулинотерапия, ауругъанлагъа къаллай аш-азыкъ иги боллугъу, диагностика, багъыу бла бла байламлы сорууланы кётюргендиле.

Минги таугъа къалай ёрлегенлерини юсюнден ала ассоциацияны Интернетде сайтында жазгъандыла. Юч кюнню хауагъа юйреннгенлеринден сора жолоучула Пастуховну къаяларына дери 4600 метр бийикликге келгендиле. Алай бла сахар диабетден ауругъанла, башха-башха жыл санда, физкультура жаны бла хазырлылыкълары бирча болмагъан адамла, чурумлагъа къарамай, маршрутларыны ахыр жерине дери жеталгъандыла эм алай бла бу диагноз жетишимлеге чырмау этмегенин кёргюзтгендиле. Кесини сайтында ассоциация Къабарты-Малкъарны Саулукъ сакълау министерствосуна, Элбрус районну ара больницасына бла гидлеге этген себепликлери ючюн ыразылыкъларын билдиргенди.

Кульчаланы Зульфия.
Поделиться: