Жангы объектлени – болжалында эм чурумсуз

РФ-ни Экономиканы айнытыу министерствосуну СКФО-да къырал программаланы тындырыу жаны бла департаментини башчысы Камиль Бексултанов «Шимал Кавказ федерал округну айнытыу» деген федерал проектни чеклеринде не мадар этиле тургъаныны юсюнден видеоконференция бардыргъанды бу кюнледе. Бизни республикадан аны ишине Правительствону Председателини биринчи орунбасары Сергей Говоров, экономиканы айнытыу министр Рахайланы Борис, «КъМР-ни айнытыу Корпорация» АО-ну башчысы Чочайланы Ахмат къатышхандыла.

Ол проектни хайырындан бизни республикада къаллай ишле этилгенини юсюнден Сергей Говоров хапарлагъанды. Ол санда Ново-Ивановское элде жангы школ барды. Бу кюнлеге объектде битеу къурулуш-монтаж ишле тамамланнгандыла, аны хайырланыргъа алгъандыла. Алай бла келир айны биринчисинде мектеп эшиклерин ачарыкъды. Белгилеп айтханда, анга бир кезиуде 440 сабий жюрюрча онгла къуралгъандыла.

Видеоконференцияда Бахсан шахар округда скважина этиле тургъанын, Къашхатауну бла Аушигерни арасында суу быргъы орнатылгъанын эмда экинчисинде аллай сетьни жангыртыу ишлени да сюзгендиле. Объектлени барында да болжалындан кеч къалмай мадар этиледи, бары да жууукъ кезиуде битерикдиле. Правительствону Председателини биринчи орунбасары ышандыргъаныча, алай болуруна бир тюрлю чурум жокъду.