Тамблагъы кюнню сагъышын этгенле

Жашау бир жеринде турмайды. Жангы технологияла чыгъа барадыла. Бир жыйырма жыл мындан алгъа ким биле эди интернет дунияны  бийлеп къояр деп. Хуржун телефонну бир-эки кнопкасына бармагъынгы азчыкъ жетдирсенг, не сорууунга да жууап келип къаллыкъды. Аллай сылтауланы хаталарындан арт кезиуде библиотекагъа келип, окъургъа китап алгъанланы санлары аздан-аз бола барадыла. Алай болгъанлыкъгъа, ала ишлерин тохтатмагъандыла.

Быланы барысын да айта келгеним, бир-бир библиотекаланы ишчилери, адамланы жюреклерине китап окъууну сингдирир ючюн, тюрлю-тюрлю амалла къурагъанларын билдирирге излегенлигимди. Кёп болмай Бахсан районну ара билиотекасында болама. Ол район администрацияны юйюнде орналыпды, адамлары да бет жарыкълы тюбейдиле. Таматасы Нагоева Радимады. Кёп жылладан бери ишлейди мында. Коллективни асламысы орта жыл санлы адамладыла.

Радима билдиргеннге кёре, районда  онтёрт эл библиотека ишлейди, алада битеу да  415 минг китап барды. Ала хар бири да темаларына кёре тапкалада ариу тап жыйылыпдыла, китап сора келген излегенин терк табарча.

Районда жашагъанладан 30 процентге жууукъ адам жылгъа бир кере  библиотекагъа келип, окъургъа китап алады. Абаданла тарых, адет-тёре жаны бла байламлы чыгъармаланы сюедиле, жерлеш авторланы китапларын сорадыла. Жаш тёлю уа асламысында фантастиканы сайлайды. Анга ол сейирди. Бери школчула да кёп келедиле. Ала да школда берилген дерслерине мында жууап излейдиле.

Библиотекада компьютерле да бардыла, керек къагъытланы кёчюрюп да бередиле. Болсада мында ишлегенле жаш тёлюню китапха эс бурдуртурча амалланы излейдиле. Аны ючюн устазланы, школчуланы чакъырып, назму окъууда, хапар айтыуда эришиуле къурайдыла.

Миллет жазыучуланы китапларына да уллу эс бурулады мында. Аланы юбилейлерине аталып  жыйылыула боладыла, бир-бирлери бла уа тюбешиуле да къурайдыла. Кёп болмай белгили жазыучу, КъЧР-ни халкъ поэти Додуланы Аскерни да чакъырып, окъуучула бла жууугъуракъ шагъырей этгендиле. Аллай тюбешиуле кёпге дери эсде къалгъанлары уа сёзсюздю.

Ата журтха сюймекликге юйретиуге  аталгъан тюбешиуле да боладыла Бахсан районну библиотекаларында. Анда да жаш тёлю назмула окъуйдула, аскер жырла айтадыла. Мындан арысында уа жангы китапланы презентацияларын къураргъа акъыллары да барды.

Бу амалла барысы да адамланы китапха эс бурурларына себеплик этерле деп ышаныулукъдула. Китапхананы ишчилери аны ючюн кюрешедиле да, ахшы муратлары толсунла.

Османланы Хыйса.
Поделиться: