Сют малчылыкъны айнытыуну къайгъысын кёре

Кёп болмай РФ-ни Эл мюлк министрини орунбасары Джамбулат Хатуов бардырып видеоконференция халда кенгеш болгъанды. Ол сют малчылыкъны айнытыугъа жораланнганды. Анга регионлада  ведомстволаны келечилери къатышхандыла, ол санда КъМР-ни эл мюлк министри  Хасан Сижажев да.   

Жыйылыуда бюгюнлюкде техника эм технология жаны бла жангыртыуланы хайырындан малчылыкъ бёлюм байламлы продукцияны танг кесекге кёбейтирге онг табылгъаны сагъынылгъанды. Саулай алып айтханда, озгъан он жылда къыралда эки мингден аслам сют малчылыкъ мюлк жангы мардалагъа келиширча болгъандыла. Аны бла бирге 792 мингден артыкъ малгъа жер къуралгъанды. Орта эсеп бла алып айтханда, ийнекледен 25,6 процентге кёп сют алырча да мадар этилгенди.

Шимал-Кавказстатны биринчи июльгъа чыгъарылгъан эсеплерине кёре, Къабарты-Малкъарда 272 минг тууар саналады, ол санда 136,2 минг ийнек. Ол былтыр бу заман бла тенглешдиргенде, 100,3% процентге кёпдю.  

Быйыл жылны биринчи жарымында 235,8 минг тонна сют сауулгъанды  неда былтырдан эсе 3,6 процентге артыкъ.

Арта заманда республиканы мюлклеринде жангы амалланы тири хайырланнганларыны, ол санда мал ашны да игилендиргенлерини себеплигинден бир ийнекден 3741 литр сют алынады неда былтырдан эсе  605 литрге аслам.