Элледе болум бла шагъырейлениу

Кёп болмай Чегем районну администрациясыны башчысы Юра Борсов Чегемде республиканы уллу инвестициялы проектлеринден бири - теплица комплексни къурулушу къалай баргъанына къарагъанды. Бусагъатда объектде аслам энчи техника мурдорун хазырлап - жерни къазып, ташып кюрешедиле.

Ызы бла «Южный» микрорайонда «Долина Кавказа» жашау журт комплексге эм школгъа бла садикге баргъан 1,5 километр чакълы жангыртылгъан жоллагъа да  кёз жетдиргенди. Игилендириу ишлени кезиуюнде участокда бордюрла, чыпынлы чыракъла, тротуарла салгъандыла эм асфальт жайылгъанды.     

Аны бла бирге Чегем шахарда Бахсан шоссени айбатландырыу бал байламлы паркланы къурулушу да тири  барады. Орамла кече жарыкъ болурча да аслам эс бурулады. Ол санда Ленин орамда, Экинчи Чегемде бла Яникойда чыпынлы чыракъланы мурдорларын салып бошагъандыла. Энди жууукъ заманда баш жанларын бегитип башларыкъдыла. Ишле саулай айны ахырына бошалыргъа керекдиле.

Тёбен Чегемде уа комиссия элни ичинде эм биченликле бла жайлыкълагъа баргъан жолланы болумларын тинтгенди. Эсге сала айтсакъ, алгъаракъалада КъМР-ни Транспорт эмда жол мюлк министерствосу мында беш километрден аслам жолгъа тынгылы ремонт этгенди. Элни администрациясыны кючю бла дагъыда жыйырма километр чакълы жол мардалагъа келиширча болгъанды. Андан сора да, таза суу жетмегени бла байламлы иги кесек тарыгъыу этилгени себепли жууукъ заманда къошакъ халда резервуар салынырыгъа да билдирилгенди.   

Юра Карабиевич Экинчи Чегемде юй къанатлыланы этлерин жарашдыргъан бийик технологиялы предприятияны ишине да бюсюрегенди. Аны производство кючю жылгъа 10 минг тоннагъа жууукъ жюз тюрлю продукция чыгъарыргъа жетерчады. Бюгюнлюкде окъуна ол регионлада иги кесек тюкенни жалчытады.

Проект толу кючю бла иги ишлеп башласа, мында иги кесек адамгъа ишчи жерле къураллыкълары, орта эсеп бла алып айтханда, аланы айлыкълары 25-27 минг сомгъа жетериги да сагъынылгъанды.