Хакъсыз дарманлагъа, медицина кереклеге къошакъ ырысхы бёлюнюрюкдю

Хакъсыз дарманлагъа, медицина кереклеге эм багъыу кючю болгъан аш-азыкъгъа Россейни льготалы къауум инсанларына деп энтта да 1,6 миллиард сомдан аслам жиберилликди. Аллай бегимге РФ-ни Правительствосуну Председатели Михаил Мишустин къол салгъанды. Къабарты-Малкъар ол жумушлагъа энтта 5,5 миллион сомдан артыкъ аллыкъды.

Ол ахча ёлчем льготачыланы 2021 жылда хакъсыз медикаментле бла жалчытырча федерал бюджетни бёлюнмеген ырысхысыды. Аллай социал тёлеу сакъатлагъа, ол санда Уллу Ата журт урушха къатышханлагъа, сакъат сабийлеге, чернобыльчилеге бериледи. Дарманла бла медицина керекле хар инсаннга энчи бёлюнедиле.

- Ырысхыны регионлагъа заманында жетдириу магъаналыды, ала адамлагъа изленнген медикаментлени  сатып алырча, - деп белгилегенди Михаил Мишустин.