Тынчлыкълы солуу – энчи эсепде

Бусагъатда кёлледе, суулада жууунуу кезиудю. Аны ючюн МЧС-ни регионда бёлюмюню ишчилери алада къоркъуусузлукъну жалчытыуну энчи контрольда тутадыла. Бу жол ала шахарны курорт кёлюнде халны тинтгендиле.

Инспекторла объектни администрациясы суулада адамланы жашауларын сакълауну эм къайыкълада жюзюуню жорукъларын къалай тутханына къарагъандыла. Ала къутхарыу пунктланы къыйын болумлагъа, батханнга неда ачыгъаннга боулушургъа хазырлылыкъларын тинтгендиле,  медицина оборудование, къутхарыу амалла (къайыкъла, жилетле, кругла) бла жалчытылыннганларын сурагъандыла, инсан сууда кесин къалай жюрютюрге кереклисине юйретген билдириу къангала, жууунургъа жарамагъан жерлени кёргюзтген белгиле орнатылгъанларына бла къалгъанларына къарагъандыла.

МЧС-чиле объектни ишчилери бла инструктаж бардыргъандыла, солугъанла бла тюбегендиле, алагъа биринчи медицина болушлукъ этиуню юсюнден юйретиу китапчыкъла юлешгендиле.  

Ведомство кёлледе, суулада жюзерге сюйгенлени жангызда белгиленнген жерледе солургъа чакъырады. Суу уллу кёллюлюкню кечмейди - къоркъуусузлукъну унутмау  жаныгъызны, саулугъугъузну да сакъларыкъды, деп эсгертедиле МЧС-ни регионда бёлюмюню пресс-службасындан.