Ишлени заманындан кеч къалмай тамамларгъа алланып

«Таза суу» федерал проектни чеклеринде Бахсан районну тийресинде бардырылгъан ишле бла байламлы КъМР-ни Къурулуш эмда жашау журт-коммунал мюлк министерствосунда кенгеш къуралгъанды. Анга муниципалитетни администрациясыны, подряд организацияланы, къурулуш контроль бардыргъан структураны келечилери эмда Огъары Къуркъужинни башчысы къатышхандыла.

Министрни орунбасары Роман Котченко эм министрни кенгешчиси Борис Балагов суу бла жалчытхан объектлени къурулушу бардырылгъан жерледе тамамланнган ишлеге багъа бергендиле. Кемчиликлени туура этип, аланы терк кетерирге чакъыргъандыла, салыннган борчланы заман болжалларын да эсгергендиле.

Бахсан районда Кишпек элде суу ызла тартыла турадыла. Баксанёнок элде уа подрядчик къую ишлейди. Огъары Къуркъужинни юсюнден айтханда, анда да аллай ызла жангыртыладыла. Ишлени бары да быйылны ахырына тамам этилликдиле, деп белгилегендиле министерствода.