Спорт сынамын андан ары ёсдюреди

Токиода  оюнланы чемпиону Мария Ласицкене жангы стартлагъа хазырланыуну башлагъанды, деп билдиргенди аны тренери  Геннадий Габрилян.

- Сёзсюз, хар спортчуну да жашауунда Олимпиада эм магъаналы эришиудю, алай аны бла спорт карьера бошалып къалмайды. Жайны ахырына дери энтта ай чакълы бир заман барды, аны тийишлисича хайырланыргъа, техниканы игилендирирге, секириуде сынамны бютюн ёсдюрюрге керекди. Мария, саулугъуна чып тюшюп, ызы бла реабилитациясы болуп, алайсыз да сезонну жартысына чыкъмагъанды. Ол хыйсапдан бусагъатда солургъа жарарыкъ тюйюлдю, - деп белгилегенди Габрилян.

Спортчу «Бриллант лиганы» Юджинада, Лоханнада, Парижде, Брюссельде кезиулерине эм 8 сентябрьде  Цюрихде финалына къатышыр умутлуду. 12 сентябрьде Польшада халкъла аралы турнирде эришгенинден сора, къышхы турнирлеге хазырланыу башланнгынчыгъа дери атлет къарыу жыярыкъды.

Эсгертиу: «Бриллиант лига» бийик даражалы коммерциялы турнирлени къауумуду, ол Женгил атлетикадан федерацияланы халкъла аралы ассоциацияларыны башчылыгъында къуралады. Мария Ласицкене уа лигада тёрт кере хорлагъан жангыз спортчуду.
 

Кульчаланы Зульфия.
Поделиться: