Кредит кимникиди?..

Айсурат бла Тимурну тойларына инстаграмда мингле бла «лайкла» салдыла. Ариу башланнган жомакъ къалай барлыкъ болур, деп тышындан къарагъан кёзле кёп эдиле. Юйюр кеме  суу тюбюнде биринчи ташха тирелгенлей, чачылды да кетди. Не таш эди ол? Ипотека. Къызны иш хакъы аман тюйюл эди да, анга банк ипотека  кредитни бек тынч берген эди. Жаш да мерседесин алгъанда жетмеген ахчасын кредит бла жапхан эди. Биринчи айда Айсурат ипотека тёлеуню Тимур этер деп сакълады, алай этмегенинден сора: «Кесинги кредитинге ахча ётдюргенде, мени ипотекама да эс бур», - деди.

- Ол айтханынг, Айсурат? Ипотека – сеникиди, кесинг тёле.

- Ангыламадым…не сеники – меники хапар айтаса?

- Айсурат, санга юч жылмы болады? Сёз ючюн, юч неда беш, неда он жылдан биз айырылсакъ, сен а артда экинчи кере эрге барсанг, мен ахчасын тёлеген юйде бир башха киши жашарыкъды…сен да кесинг ипотекангы, мен да кесим кредитими тёлейик андан эсе.

- Кесинг, кесим…Тимур, хар бирибиз кесибизни жашауубуз бла жашарыкъ эсек, бизни не бир бохчабыз, не бир бирибизге болушхан тёребиз боллукъ тюйюл эсе, юйюр къурап не кюрешгенбиз? Айырылайыкъ да къалайыкъ.

- Эшик ачыкъды. Сен мени къоркъутургъамы сюесе?

- Угъай, къоркъма тиширыудан…алай кишилигим болса, быллай хапар да башламаз эдинг.

- Айсурат, баям, алгъадан, тойгъа дери айтылыргъа керек эдиле бу затла. Мен жер башында бир адамгъа да иш хакъымы берирге сюймейме. Юйюр къурагъанлыкъгъа, хар кимни ахчасы – бохчасы башха болургъа керекди. Мени акъылым алайды.

- Мени акъылым а башхады…да не этейик, созмай ишни, айырылайыкъ.

Ма алай кредитле жангы юйюрню чачдыла.