Кюн иссиледе токдан хата жетмезча

«Россети Северный Кавказ» «Каббалкэнерго» компания кюн иссиледе  Къабарты-Малкъарда  жашагъанланы энергокюч бла   чырмаусуз  жалчытыргъа  аслам эс бурады.

  Эсге сала айтсакъ, быйыл жай болмагъанча къызыуду. Тюзледе  термометрде  40 градусха жетген кезиуле да боладыла. Ол а  сетьлеге да уллу ауурлукъ салады. Аны ючюн  профилактика халда энергообъектледе ёртен къозгъалып  тёгерекге жайылмазча – агъачха эм   сабанлыкълагъа да заран жетмезча  тийишли ишле этиледиле. Бусагъатда сагъынылгъан мадарла 55 гектарда тамамланнгандыла.

Кёп болмай компанияны келечилери план бла эмда андан тышында  35-110 кВ кюч бла ишлеген 74 подстанцияны,  ток баргъан ызланы  эм башха объектлени да болумлары бла шагъырейленнгендиле.   Аслам эс от тюшгенден къорууларча затлагъа  бурулгъанды.  Ол санда    жангыртыу  жумушла да  этилгендиле.  Аны хайырындан бюгюнлюкде подстанцияла чырмаусуз ишлерча болгъандыла.

 - Энергетикле  кюн сайын тюрлю-тюрлю участоклада тири къармашадыла  – профилактика ишни  бардырадыла, ремонт этедиле эм жауунланы, желлени кезиуюнде  этилген бузукълукъланы къысха заманда кетередиле.   Ол себепден бюгюнлюкде аварияла ючюн   кёп заманны  токсуз къалгъан болмагъанды, - дейди   «Каббалкэнерго» компанияны таматасы  Муртаз Каров.