Энергетиклени сорууларына толу жууапла берилгендиле

Эсге сала айтсакъ, быйыл биринчи августдан башлап, бизни республикада электрокюч бла жалчытыу жумушну «Россети Шимал Кавказ» компания тындырлыкъды. Ары дери уа кёп жылланы ичинде бу борчну «Каббалкэнерго» предприятие тамамлап тургъанды.

Иш алай боллугъу себепли компанияны келечилери – аны башчысыны орунбасарыны къуллугъун толтургъан Сергей Смагин, электрокюч рынокда субъектле бла байламлыкъла жюрютген эмда ишчилеге къарагъан бла проектле тамамлагъан департаментлени башчыларыны къуллугъун толтургъанла - Аслан Докшукин бла Алла Цупило «Каббалкэнергода» уруннганла эмда аны профсоюз организациясы бла тюбешгендиле.

«Соруу-жууап» халда бардырылгъан жыйылыуда электрокюч бла жалчытырыкъ жангы структурагъа ишчилени алыуну юсюнден сёлешиннгенди. Специалистле айлыкълары, къуллукълары, аланы стажлары къалай сакъланырыгъын сора эдиле асламысында. Дагъыда жангы жерге кёчюу къалай боллугъун да билирге сюйгендиле. Компанияда айтханларыча, сорууланы барына да толу жууапла берилгендиле.