Электрокюч бла жалчытыуда тюрлениулени ангылатхандыла

Республикада электрокюч бла жалчытыу жумушланы быйыл биринчи августдан башлап «Россети Шимал Кавказ» компания тамамларыгъыны юсюнден алгъаракълада да  билдирген эдик. Ары дери ол борчну кёп жылланы ичинде «Каббалкэнерго» предприятие тындыргъанды.  Энди не зат тюрлениригини юсюнден бу кюнледе пресс-конференция бардырылгъанды. Анга ол предприятияны башчысыны орунбасары Эллина Шустова, компанияны регионда бёлюмюню башчысыны орунбасары Будайланы Ахмат, КъМР-ни промышленность, энергетика эм сатыу-алыу министрини болушлукъчусу Алим Тохов эм башхала къатышхандыла.

Ал сёзюнде Эллина Шустова бу иш не хыйсап бла этилгенин айтханды: «Аны тамыры  республикада предприятияла бла ЖКХ организацияла электрокюч ючюн иги кесек тёлемей тургъанларындан келеди. Аны ючюн «Каббалкэнерго» да токну оптовый рыногунда къадар борч этгенди. Аны барын да эсге алып, «НП Совет рынка» ассоциация бу предприятияны электрокючню сатыу рынокдан кетерирге оноу этгенди. Ызы бла РФ-ни Энергетика министерствосуну буйругъу бла аны иши «Россети Шимал Кавказ» компаниягъа кёчюрюлгенди».

Токну сатыучу предприятие алышыннганы ючюн тарифле неда башха затла тюрленирикмидиле,  деген соруугъа жууап бере, Эллина Шустова хар не да алгъынча къаллыгъын белгилегенди. Биринчи августха дери ахчаны «Каббалкэнергону» реквизитлери бла тёлерге керек эди, андан сора уа «Россети Шимал Кавказгъа». Сёзсюз, анда реквизитле башха боллукъдула. Адамлагъа уа ары-бери барып заявление жазаргъа керекмейди. Аланы лицевой счётларыны номерлери, тёлеулени жыйыучу пунктла да алгъынча къаллыкъдыла.

Бюджет организацияла жангыдан келишим этерге борчлудула. Башхала уа, ол санда предприятияла эмда энчи предпринимательле да, алгъын келишимлеринде аз-маз тюрлениулени (жангы реквизитле эмда ток сатыучу компанияны аты) дурус кёрюп, къол салыргъа керекдиле. Бу кюнлеге аллай келишимлени 93 проценти жангыдан этилгендиле. Ол санда 729 келишим – бюджет организацияла бла. 

Айтылгъаныча, хайырланыучула тёлеулерин шёндюге дери къалай берип тургъан эселе да, мындан арысында да алай этерге эркиндиле: абонент пунктлада, онлайн халда, почтада, Сбербанкны бёлюмлеринде, компанияны сайтында энчи кабинетде. Пунктланы саны тюрленмегенди, сау республикада алгъынча онекиси ишлейди. Ток бла жалчытыу жумушну августдан башлап жангы компания тамамларыгъыны юсюнден тёлеуле жыйыучу пунктлада, банклада билдириуле тагъып, СМИ-де да  туура этгендиле.

Эллина Шустова айтханыча, бу тюрлениулени кезиуюнде электрокючню хайырланыучуланы барында да эсеплеучю приборланы кёргюзтюулерин алыргъа керек эди. Мындан арысында алагъа къайда да терс квитанция жиберип къоймазча, аны жик жиги бла этерге борч салыннганды. Компанияны адамлары кёргюзтюулени юй сайын айланып алгъандыла. Башхаларындан а телефон, интернет, смс, электрон почта бла да сурагъандыла. Алай бла бу айны биринчисине ишни эбине жетдиргендиле.

«Каббалкэнергода» ишлегенле бла уа къалай боллукъду, ала тышындамы къаллыкъдыла, деген соруугъа Шустова: «Угъай. Бары да жерлеринде къаллыкъдыла», - дегенди. Ол айтханыча, компанияны тийишли департаментини башчысыны къуллугъун толтургъан алгъаракъда предприятияны профсоюз организациясыны келечилери бла тюбешгенди. Ишчи келишимни болжалы чыкъгъынчы дери адамла алгъын жерлеринде урунурукъдула. Андан сора уа, бёлюмню структурасы тохташдырылса, ары къаллай специалистле изленириги белгили болса, жангыдан ишге алып тебирерикдиле.